BJP toktsütsü mulunga lir: Shatrughan Sinha

New Delhi, January 21 (Agencies): Bihar kübok Patna Sahib nungi MP Shatrughan Sinha par party lennirtem dang tejashiba lir aser tanü pai “party high command-i anenang ta shira, BJP toktsütsü mulunga lir” ta metetdaktsü.
Shatrughan Sinha-i par party aser lennirtem anema jemiyonga arur aser yakünü pai Trinamool tanishir Mamata Banerjee-i ayongba rally nung aden. Iba rally ta BJP anemba political party tem atema ayongzükba liasü.
Iba sentong nung Shatrughan-i Prime Minister Narendra Modi dak tai tongloktsü aser “chowkidaar chor hai” ta aitsü.
Tang tashi BJP-i Shatrughan Sinha dak mapa kecha meinyak lir saka parnok otongdar Rajiv Pratap Rudy-i pa Kolkata rally nung adenbaji party-i süoki ia bilemer.
Bihar nung BJP lennir Sushil Modi-i pa anema jembiba atema Shatrughan-i “Iba Modi ya shiba? Ni BJP nung Modi ka dang meteta lir. Ibaji action hero, asen Prime Minister Narendra Modiji lir. Kü nem tetuyuba agütsüba nisungtem ya shirnok? Parnok dang kü tenüng amshitsü melena tanga mapa ajanga nüngtugu akümtsü merangang ta shiang” ta metetdaktsü.
Pai political party tasen ka tentettsü asü koda ta osangbener dang asüngdangdang, ibaji tarutsü nung metettsü ta langzü.
“Basant Panchami temeshi benjung arudakjang. Ajak jangjatsü. Idangji, Mamata Banerjee mesüra Arvind Kejriwal-a süang kü den yaritepertem shirnokar metettsü. Item nisungtem ni akhümtsübur. Yimten tsütsü teloktep tashi aittsü atema kati ka akhümtsübuteptsüla” ta paisa ashi.
Honibarnü Kolkata nung Mamata-i ayongba sentong nung opposition party lennir 22 tashi adenshia shilem agi.
Iba sentong nung AAP nungi Arvind Kejriwal, TDP nungi Chandrababu Nadu, SP nungi Akhilesh Yadav, DMK nungi MK Stalin nungertem aden. Congress president Rahul Gandhi aser BSP lennir Mayawati na medentet saka tena melena teshimtet nübotem yok.