BJP tongtipurtemi Smriti Irani dang tekümdangtsü tuyu

New Delhi, Feb. 28 (Agencies): Tawa Parliament nung Human Resource Development (HRD) Minister, Smriti Irani-i ain adoka jembiba sülen BJP bangtak lenirtemi la dang tekümdangtsü tuyuogo, ta osang angazüker.
Asian Age nung osang ka ajanga ashiba agi, party bangtak lenirtemi Smriti Irani dang alia mejembitsüla ta ashiba dang masü saka Union Finance Minister, Arun Jaitley danga iba anogo nung JNU onük nung o toktepba mapang opposition den liromedemtsü atema tiyongtsüi ia jembitsü tuyua liasü.
Iba osang ya shitak asütsü südi ta bilemer, kechiyong Rajya Sabha nung telangzüba ka agütsüdang Irani-i, “Kü dang tekümdangtsü shiogo, ibayongji,” ta jembia lir, ta Asian Age osang ajanga metetdaktsü.
Kasa osang ajanga, iba anogo nung lai jembiba onük tu BJP nungi OBC lenir karibo magizüktet. Lai ‘Mahishasura martyrdom’ aser ‘Durga tsüngrem’ indang jembiba parnoki magizüktet, ta ashi.
Irani-i timtem ajurutsüa akok, kechiyong JDU MP, KC Tyagi, MP, KTS Tulsi aser CPI (M) nungi Mohammad Salim nungeri Rohith Vemula soseta asüba ken o nung Hombarnü la anema ‘privilege motion’ benoktsü.
Hokolbarnü Irani-i Rajya Sabha nung Durga tsüngrem süoka jembiba ajanga tashishitep adoka opposition-i la dang taktok meshitsü akhang, saka lai ibaji magizük.
2014 küm JNU nung Mahishasura sentong dak sentakba nung Hokolbarnü JNU nung PhD kaketshir, Anil Kumar-i, HRD Minister Smriti-i yazü jembiogo, ta ashi.
Anil Kumar-i, “Bodhbarnü Smriti Irani-i Parliament nung pamphlet ka nungi azüngbaji ni mesüra ozü medemertemi züluba masü. Onük jembidang la ket nung aliba pamphlet tu sentsüh teperi ser kanga junger, aser printing jenjang kanga asakba yong iba amaji JNU lungkak aitdang kodanga mamshir. Iba kaketji taila aser minister-i yazü jembir,” ta ashi.