BJP ya Khristan tem anemba telok masü : Kohli

Guwahati, July 14 (Agencies) : BJP ji Khristan anemba telok ka masü aser parnok den tokteper yimten telok kari iba tiyazü osang belenshir ta Mongulbarnü BJP-i metetdaktsü.

“Onok ya terenlok atema inyakba telok ka lir. Onok den toktepba yimten teloktemi tiyazü osang prokshir. Onok Khristan tem anemba telok masü” ta BJP otongdar aser Meghalaya in-charge, Nalin S Kohli-i osangbener dang ashi.

“Atangji nung Goa Deputy Chief minister ji BJP züngsem lir aser paji Khristan tamanger ka lir” ta Kohli-isa ashi.

Guwahati nung ‘Maha Sampark Abhiyan’ agiba sülen Kohli den tanga BJP lennirtemi osangbener den ajurutepa sensaksemdang iba olen jembi.

Tanü agiba senden nung BJP-i Meghalaya, Nagaland aser Mizoram nung nübo talila bendenloktsü atema jembi.

Meghalaya, Nagaland aser Mizoram ama Khristan tamangertem timba aliba state tem BJP züngsem timba akümba ajanga BJP ji Khristan anemba telok ta mesayur, ta Kohli-isa metetdaktsü.

Küm ka tsüngda Meghalaya nung BJP züngsem 23,000 aliba nungi 60,000 jungogo aser Nagaland nung 11,000 aliba nungi lakh ka shi jungogo, ta paisa ashi.

Mizoram nunga küm ka tsüngda BJP züngsem 11,000 nungi 80,000 jungogo, ta paisa shisem.

BJP tir Amit Shah den senden agiba indang jembidang Kohli-i ashiba agi, “BJP President-i party mapa inyaker ajak dang yaküm ‘missed-call’ mapa inyakyim ajanga züngsem tasen akümertem tonga oa ajuruteptsü tetuyuba agütsü.”

“Yaküm ‘missed-call’ inyakyim ajanga onoki züngsem crore 11 den timba tongtetogo” ta BJP General Secretary, Kailash Vijaywargiya-ia osangbener dang ashi.

“Tang onoki item züngsem tasentem den tesentaktep yanglutsü, parnok BJP tesayuba den sendakteptsü aser party mapa atema training tajung agütsütsü mapa anünga lir,” ta Vijaywargiya-isa shisem.