BJP yimsüsüba anema Left party temi July 20 nü lungkak aittsü

Jaipur, July 11 (Agencies): BJP-i yimsüsüba Centre sorkar aser state tem yimsüsüba nung ochimashi anema July 20 nü Left party temi linük tesem ajak nung lungkak aita ochimashi chief ministers aser minister tem nem temerenshi agüjang ta takhangba agütsütsü.

“Parliament senden tenzüktsü anogo ka lia July 20 nü ochimashi anema linük tesem ajak nung lungkak aittsü Left party temi lemtetogo, aser BJP nungi ochimashi nung densemba chief minister tem aser minister tem nem temerenshi agüjang ta onoki akhangtsü,” ta CPI National Secretary D Raja-i ashi.

CPI secretary-isa, Rajasthan sorkar nungdang masü saka Madhya Pradesh, Chhattisgarh, aser Maharashtra state tem nunga ochimashi jungkai adokogo; aser item ajak asoshiji Ato kilonser Modi-i ola madoker, ta ashi.

Rajasthan, Madhya Pradesh, Maharashtra aser Chhattisgarh sorkartem nung ochimashiji tangbo nüburtem tsüngdang jungkai adokogo aser item ochimashi nung densema alir lenirtemji sorkar menden nung maneni amentsü temeten mali, ta paisa ashi.

“Rajasthan nung yimsüsüba khenyongi mejungi lir. Anti-labour legislation bener aruba mezüngbuba state ji ibai lir. State nung tangalen nungi arua aayangertem asoshi kümzüktsüsa jenjang mali,” ta Raja-i ashi.

Paisa, state tem nung ochimashi aliba onük nung Ato kilonser Narendra Modi-i ojang ka danga mejembi mesüra ochimashir lenirtem anema temerenshi agüja mali, aser ibaji ajanga mulung malemtsüsa adokogo, ta ashi.

“Item onük ajak jungkai adoktsütsü asoshi July 20 nü onoki linük tesem balala nung lungkak aittsü ayongzükogo,” ta ashi.

Raja-isa, “Ato kilonser Modi-i, Centre sorkari küm ka yimsüsüba nung ochimashi maliasü ta jembiogo saka tangbo Madhya Pradesh nung Vyapam ochimashi ken o reprangang, linük nung iba ochimashi ya balaka, kong aibelenertem, kulisertem aser osangbenertem kuli maliba yimya balala nung asür. Ajisüaka MP Chief Minister-i iba asoshiji khuret magir,” ta ashi.

Paisa Rajasthan, Maharashtra aser Chhattisgarh nung ochimashi ken otem aser tarak keta aliba minister tem aija jembiogo.