BJP Youth wing-i Shillong nung rally ka ayongzüka aka

Sillong, September 20 (Agencies): Meghalaya Bharatiya Janata Party (BJP) puri Bodhbarnü Shillong yimti nung ‘anti corruption rally’ ka ayongzüka kaogo. Iba sentong nung parnoki Congress puri aniba sorkari ochimashi maparen balala inyakba anema nokdaka liasü.
Iba sentong ya Additional Secretariat kima nungi tenzük, kong BJP pusemertem adenshia parnoki yimti süa sorkar anema aser ochimashi maparen balala anema slogan balala ayima senzü. Slogan tem rongnung, “Onoki ochishiba sorkar aginür” “Lanur ka tinyaktsü ji ochimashi anema nokdaktsübaji lir,” ta iba amala liasü.
Bharatiya janata Yuva Morcha mesera BJYM pur indang rally nung state BJP, tir Shibun Lyngdoh aser tanga party züngsemtem densama liasü.
Osang benertem den jembidang BJYM, tir, Egenstar Kurkalang-i ashiba agi, ‘anti corruption protest rally’ ya electricity bill nung timtim aliba, education tsütsü ochimashi ken o, aser lenmang majungba anema ayongzüka akaba lir.
Sorkari ochimashi maparen balala inyakba dak sendakba nung Kurkalang-i ashiba agi, Chief minister nungi tenzüker department balala nung ketdangsertemi nüburtem kanga mazüngi ashioktsüdar aser fund balala parnok ajangzüktsü asoshi amshir.
Kurkalang-i ashiba agi, state sorkari Meghalaya Electricity Energy Corporation nem sen crore 7 agütsütsüba lir, aser iba ya aodoktsü atema nüburtem dak nungi sen tali meshizüker, ajisüaka yimti nung electricity bo junga magütsür.
Paisa ashiba agi, High Court ajanga state sorkar dang mapa tazüng aliba nung tesayur 900 shimtsü asoshi tetuyuba agütsüogo, saka sorkari tang tashi nung kecha inyaka mali.
Maneni sorkari kaketshirtem nem 2014 nungi tenzüka scholarship ajak magütsüteti arudar aser nüburtemi education inyakyim nung state nung question paper tem leak asüba aser back door appointment tem amala maparenajak ngujema aruogo, ta paisa maneni shisem.