BJP züngsem cr 11 jungogo; NE nung rangloker

New Delhi, July 12 (Agencies): Deobar nü BJP-i ashiba agi linük nung tenüng züluoka party züngsem akümer nisung crore 11 jungogo aser northeast state unit ti asoshi Delhi nung party Tir Amit Shah-i outreach programme ka tenzüktsüogo.
NE state tem asoshi ‘Mahasampark Abhiyan’ tenzüktsüba sülen Amit Shah-i, “Item züngsem crore 11 ya yimtenren tashi ajangzüktsü asoshi mamshitsü saka linük ainba nung amshitsü,” ta ashi.
Iba senden tembangba sülen osangbenertem den jembidang BJP national secretary Bhupendra Yadav-i, “Amit Shah-i nisung timba den sentakteptsü asoshi tasa lemtepogo. (Abhiyan mapang) Reprangshimba sülen züngsem tasen anioktsü,” ta ashi.
“Onoki züngsem aniokba maparen tenzükdang ozü party dak tamang akar nisung den sentakteptsü aser taliba anidentsü asoshi inyaka liasü. Onok nükjidongji crore 10 liasü saka tangbo iba dak tema kümogo aser taküm April nung züngsem crore 11 ajangogo,” ta general secretary (Organisation) Ram Lal-i ashi.
“August ita party nung inyakertem aser züngsem tasentem asoshi workshop alitsü. Ozü party tashi itshitsü ya state mesüra district level nung masü saka mandal level nung inyaker,” ta Lal-i ashi.
Tanü iba senden nung party MP tem, MLA tem, state unit tongtitem, mayors aser Delhi, Haryana, Punjab, Chandigarh, Himachal Pradesh, J&K, Uttarakhand aser Rajasthan nungi party lenirtem dena liasü.