BJP züngsem tain, K.Medom asüpila sentong agiogo

Dimapur, Monupii/May 12 (TYO): Monupii/May 12, 2018 nü Supply Colony, Dimapur nung BJP züngsem tain, asür K. Medom Angami asüpila sentong agiogo; pa mapang tatsüka shiranga aliba sülen Monupii 11, 2018 nü Zion Hospital, Dimapur nung asü, ta Media Cell, BJP Nagaland-i sangdong ka nung metetdaktsü.
“Party-i Bharatiya Janata Party of Nagaland nung züngsem tain, asür K.Medom Angami’er kibong züngsemtem den mangyim jashi lemsateper. Pa asüba ajanga party tentet nung tapok paogo,” ta kasa sangdong ajanga metetdaktsü.
State BJP Nagaland tenüng nung asüpila sentong nung jembidang BJP züngsem tain, K.James Vizo-i, “Asür, K.Medom ya tangatetba tajung benshiba nisung ka liasü aser pai Party tsüngchia tenzük. Pai ochi tanela nung rara aser Party temzüng akhümtsübua benshia liasü,” ta metetdaktsü.
“Party nung aika atema pa ya yimtenren tesayur ka aser ajungmesor ka liasü. Pai tesüiba küm 18 nung inyakba mapa tajungtemji Nagaland BJP-i teti bilemtettsü. Pa tanela tesünep nung anisüngzükdakjang,” ta paisa shisem.
Asüpila sentong nung Deputy Chief Minister, Y. Patton densema party nung lenirtem aser züngsemtem aika densema liasü.
Kasa sentong nung State BJP Nagaland nungisa BJP züngsem tain, Yambos Murry-ia jembia liasü.
Tesüiba küm 18 tashi asür, K. Medom-i menden balala nung party tenzüka aruogo, aser item rongnung:
1. Dimapur District President (2000-2003).
2. Kisan State President (2003-2006).
3. State Executive Member (2006-2009).
4. State Vice President (2009-2012).
5. National Executive Member (2012-2015).
6. State BJP Core Committee Member 2015 nungi tasünü tashi.
7. BJP Office Construction Committee Convenor 2014 nungi tasünü tashi.
8. BJP Disciplinary Action Committee (DAC) Convener 2016 nungi tasünü tashi.