Black money agi ‘white’kümtsütsü sorkar sentong lir: Rahul

New Delhi, March 02 (Agencies): Tanü Bodhbar nikongdang Lok Sabha senden nung ‘black money’ ken o nung Ato kilonser Narendra Modi-i aniba NDA sorkar aija Congress tatong Tir, Rahul Gandhi-i, iba linük nung black money agi white kümtsütsü atema NDA sorkar ket nung “fair and lovely” lir, ta ashi.

Modi’er sorkari black money rizüngertem kümzüka ayur ta aija Rahul-i, “Black money agi white kümtsütsü atema parnoki ‘fair and lovely plan’ benoker,” ta ashi.

“Modi-i ochimashi rongsen alirtemji tepoukdaki yoktsü ta nangzükogo. Tangbo parnokji kümzüktsü atema parnoki lenmang ka bushitetogo,” ta pai ashi.

2014 general election nüboyimba mapang Modi-i bendang linüktem nung ochimashi rongsen alirtem nem temerenshi agütsütsü ta nangzüka liasü.

Tanü nikongdang Parliament nung Rahul-i jembiba mapang Modi bo senden nung maliasü, ajisüaka tesülen Modi senden telungi aitdang Rahul-i ano tanaben taitsüba oji lepshia jembi. “Naibo (Modi) mangashi. Ajisüaka ni nenok indang ‘fair and lovely’ sentong indang jembia liasü,” ta Rahul-i menürema ashi.

Hombarnü General Budget 2016 benokdang Union Finance Minister Arun Jaitley-i ochimashi sen bendena alirtemi saru magütsüi aliba sen aser osettset shilem 45 sorkar nem agütsüba ajanga tai atoktsü atema amnesty scheme ka sangdonga liasü, aser iba dak sentakba nung tanü Rahul-i NDA sorkar aitsüogo.

Rahul Gandhi-i opposition dang, “Onoki jembiba angang, onoki ya nenok tsükchirtem masü, onoki nenok mesembar,” ta ashi.

Rahul-isa, “26/11 (Mumbai amakba) sülen onoki alima tsüngdang Pakistan ya ‘makang tila’ ka nung ayu, saka onoki küm trok kanga meranga inyakba mapatemji Ato kilonseri Pakistan Ato kilonser den süngo ajemba ajanga raksatsüogo,” ta ashi.

Ato kilonser Narendra Modi-i par minister tem aser külem tenzükertem o magir ta aija Rahul-i, Ato kilonseri shinga o magir, pai shinga den masüngdangtepi Pakistan semdanga Pakistan Ato kilonser ajurua senden amen, ta aitsü.

Paisa Modi dang, nai Union Home Minister Rajnath Singh, Exernal Affairs Minister Sushma Swaraj aser army bangdakpurtem den shisa lemsateptsüla, ta ashi.

JNU dak sentakba ken o nung Patiala House court telung nung JNU kaetshir telongjem Tir, Kanhaiya Kumar, tesayurtem, osangbenertem aser kaketshirtem dak azükba dak sentakba nung Rahul-i, “Osangbenertem, tesayurtem aser kaketshirtem dak azükdang kechiba nai (Modi) ola madok(?)” ta asüngdang.