Black money atema India linüki UN teyari meshi

New Delhi, May 15 (Agencies): Linük nung saru magütsüi nija aser telok balalai bendang linüktem nung rizüngba ochimashi sen meyipa bener arutsü atema India nunger agency temi inyaktepba mapang ka nung iba atema Narendra Modi’er sorkari British Ato kilonser, David Cameron densema alima lenirtem teyari meshiogo.
UN Convention Against Corruption (UNCAC)-i, auyaba mesüra saru magütsüba sen indang osangtsüsang alima linüktemi lemsateptsüla, ta shiogo.
May 11-12 anogotem nung London nung global Anti-Corruption Summit alidang Central vigilance commissioner, KV Chowdary-i, “Ato kilonser (David Cameron), Arrla 521 ajanga ashiba nung ajemdaker osettsüset/sen meyiptsütsüji UNCAC indang onük ka lir, aser auyabatem tekaraba nung meyipa bener arutsü atema linüktemi International jenjang nung amalitepa yariteptsüla,” ta ashi.
Iba summit nung India tenüng nung Chowdary den Enforcement Directorate (ED) tongti, Karnal Singh na aden.
Paisa, “Sorkar, rejutem aser shishilembabaren nung ochimashi nokdangtsü atema India-i nüngdakba mera balala agitsü,” ta ashi.
Iba summit nung India-i, “G20-i benokba ama aser Crime Prevention & Criminal Justice 13buba UN Congress alidang agizükba Doha declaration atema onoki inyaktsü,” ta ashi.