Black money atema India team-i Switzerland linük semdangtsü

New Delhi, June 16 (Agencies): Tawa Ato kilonser, Narendra Modi-i Switzerland lenirtem ajuruba sülen kobi melii India nunger ketdangser teshimtet telok kati Switzerland semdanga Swiss bank tem nung ochimashi sen rizünger India nunger tenüng agüjang ta mepishitsü.
2018 küm nungi tenzüka linük ana tsüngda iba ken o nung osangtem lemsateptsü atema tezüngzüktep agitsü asoshi inyaktepdar.
Bodhbarnü Swizerland nungi teshimtet telok kati Delhi nung finance ministry nung tongti ketdangsertem ajurua linük ana tsüngda tesentaktep onüktem, multilateral tax aser senotsü dak sentakba onüktem nung o lemtepogo.
Iba mapang nung Swiss state secretary for international financial matters, Jacques de Watteville-i, “Automatic exchange of information (AEOI) maparen tenzüktsü atema tangbo Switzerland ket nung nüngdakbatem lir aser taküm küm tatemlen tashi nungbo linük ana tsüngda tezüngzüktep ka agitettsüa akok,” ta ashi.
“Kodang iba tezüngzüktep agidir 2018 küm nungi India-i Switzerland nung India nungertem indang bank account osang angutsü,” ta finance ministry sangdong ka ajanga ashi.
Tekaratiba nung tezüngzüktep agitettsü atema linük anaprong nungi mongintem taküm September ita nung ajurua AEOI atema jembitsü.
Iba senden sülen linük anaprong külen sangdong ka ajanga, “Mapang shia tongtepratepa alitsü bangjemogo,” ta metetdaktsü.