Black Money bener arutsü atema Centre-i inyakdar: Venkaiah Naidu

Hyderabad, May 29 (Agencies): 2014 küm Lok Sabha election mapang nung bendanglen nungi black money meyipa bener arutsü nangzükba ama NDA sorkari meinyaket ta aitsüba mapang ka nung tanü Union Minister, M Venkaiah Naidu-i, ochimashi rongsen kaktettsü atema sorkari mera takang agidar, ta ashi.
Parliamentary Affairs Minister, Naidu-i, Congress yimsüsüba mapang International tezüngzüktep agibatem nung black money meyipa bener arutsü atema lenmang lapokdar, kechiyong item tezüngzükteptem nung miim onüktema densema liasü, ta ashi.
Congress aitsüba olen ka nung pai, “Onoki agiba meratem reprangdangang. Congress yimsüsüba mapang International tezüngzüktep agibatem nung black money meyipa bener arutsü lenmang lapokdar. International tezüngzükteptem nung miim onüktem lir. Itemji Congress yimsüsüba mapang bangjem. Iba atemaji tang onoki inyakdar,” ta metetdaktsü.
“G-20 senden alidang Ato kilonser (Modi)-i iba onük benok, iba sülen ozüng takang yanglu. Black money atema ozüngtemji kanga tesashi ta taitsübatem lir,” ta paisa shisem.
Bendanglen ochimashi sen rizüngdang Congress-i aniba UPA sorkari ibaji nokdangtsü atema meinyak ta aija Naidu-i, “Tesangra nisungtem, shirnoki sen benden, parnoki tim mesüi anguba rongsenji bendanglen rizüng,” ta ashi.
“Black money ji linük nung aser bendanglen naprongla nungi angu. Inyakyim nung ochimashi aliba ajanga black money onük adok. Coal aser spectrum allocation nung onoki ochishia inyakbaji reprandangang. Sen lakh crore 3.10 dak tema senpong nung kümzükogo,” ta paisa ashi.
“Tamalen bendanglen ochimashi sen rizüngdang Congress party-i teinyaktsü inyak asübo tang onoki iba anema inyaktsü asü (?) L K Advani-ia iba onük benok. (Saka) Parnoki (Congress) kecha meinyak,” ta pai ashi.
“Iba ya temela mapa ka masü. Iba ya, na tayimtsü ka nung oor sen nungji teka ia meyipa bener arutettsüsa temela masü. Ajisüaka onoki iba atemaji inyaktsü. Onok tajungtiba nung inyakdar,” ta paisa shisem.