Black Widow film atema Scarlett Johansson nem US dollar million 15 agütsütsü

Scarlett JohanssonMongputeni/October 12 (Agencies): Marvel Studios-i actress Scarlett Johansson nem taruba ‘Black Widow’film atema US dollar million 15 (sen cr. 100 dak tema) agütsütsü ta, The Hollywood Reporter sangdong ka ajanga metetdaktsü.
Scarlett nem Marvel Studios-i agütsütsü aliba sen ya actor Chris Evans aser Chris Hemsworth nati Captain America aser Thor film den külemi taküm küm indang Avengers: Infinity War film ajanga aazükba den kasa asütsü.
The Hollywood Reporter ajanga ashiba agi, Marvel Studios-i actor nem parnok indang mezüng ‘standalone’ film atemabo ita sen aika magütsür. 2008 küm ‘Iron Man’ film atema Robert Downey Jr nem US dollar 500,000 agüja liasü. Iron Man project ya Marvel Cinematic Universe indang mezüngbuba film lir.
Black Panther film atema actor Chadwick Boseman nem US dollar million 2 agütsü saka taruba sequel atema Boseman nem sen temloker agütsütsü akok.
Kasa osang ajanga ashiba agi, taruba Captain Marvel film atema actress Brie Larson nem US dollar million 5 agütsütsü.
Film otsü nung Scarlett-i tongti shilem agiba ‘Natasha Romanoff mesüra Black Widow’ ya Russia nunger idanngiter (spy) ka superhero agi melenba indang lir.
2010 küm Marvel Cinematic Universe indang Iron Man 2 film nung Scarlett-i Black Widow shilem agiba nguogo. Iba project sülen Scarlett-i The Avengers (2012), Captain America: The Winter Soldier (2014), Avengers: Age of Ultron (2015), Captain America: Civil War (2016) aser Avengers: Infinity War (2018) film tem nung Black Widow/Agent Romanoff shilem agiba nguogo.
Black Widow film yanglutsü mapang talangka agiba atema nüburtemi Marvel anema jembia liasü.
Director, Cate Shortland lenisüba kübok yanglutsü aliba film ya Marvel Studios indang Captain Marvel sülenbo superhero tetsür kati tongti shilem agiba film tanabuba asütsü.
Captain Marvel film ya America nung Metsüremi/march 8, 2019 küm sayatsü ternemba lir.

You must be logged in to post a comment Login