BlackBerry-i WhatsApp aser Facebook dang temulung masür

New York, March 23 (Agencies) : WhatsApp-i dang masü saka Facebook-i dena taküm 2016 küm tatemlen nungibo BlackBerry platform toktsütsü aser iba sülenjibo BlackBerry atema application programming interfaces (APIs) menüngittsü. Iba osang ajanga Canada nung aliba company tera mepelai.
BlackBerry Ecosystem & Developer Outreach team app nung senior manager Lou Gazzola-i,  Facebook aser WhatsApp ya nüburtem ajaki kanga sapur saka parnoki Blackberry menungittsü ta angashia kanga temulung mepelai bilemer, ta ashi.
“Onoki WhatsApp aser Facebook na den anosa külemi inyaktsü raradangogo, ajisüaka tan yabo parnok telemtetba kanga akhanga lir, anungji nüburtemia koma bilemerar social media ajanga lemsatepang,” ta Gazzola blog post ka ajanga lemsatep.
BlackBerry-i parnoki yanglutetba operating system (OS) dang masü saka tanga OS dak tena rangloker inyakba mapang ka nung iba osang ya angashirba lir.
PArnoki yaküm 2015 küm parnok meyong Android ajanga amshiba phone Priv yanglu. Iba phone ji sen 62,990 agi ayok. Priv phone nung Android atema BlackBerry indang DTEK enokja lir aser ibaji ajanga iba phone tangari amshi mamshi meteter.
“Item phone tem nungitsü aser app tasentem ajungkettsü asoshi onoki tang BlackBerry nung ‘native application’ kar sayar aser ibaji  ‘Great Apps on BlackBerry’ tarensen nung angutsü. Iba tarensen nung application 20 lir aser iba tarensen ya ita shia khen metetdaktsür,” ta Gazzola-i ashi.
“Onoki app tasen aser customer tasen dak rangloker inyaker aser company nung kechisarena yanglutetertem dang kanga pelar,” ta pai ashi.
Smartphone ayokba noklang nung shilem 99.5 tashibo Apple, Google aser Microsoft indang mobile phone operating system tem ajanga lir.
WhatsApp telemtetba agi amshitsü aliba phone temji Nokia S40 aser Nokia Symbian S60 na den tejenba Android  2.2 aser Windows Phone 7.1 operating systems nata dena lir, ta WhatsApp company sangdong ka ajanga ashi.
“Item phone tem ya asenok asoshi kanga tongtibang lir ajisüaka onoki nüngdakba ama app tem renloka amshitsü item phone tem dak tashi mali”, ta company-i metetdaktsü.
“Iba telemtetba ya mela mela agi masü ajisüaka kangasa shisadangera iba mera ya agi,” ta WhatsApp-isa ashi.
Company-i, 2016 matem dangsa Android, iPhone mesüra Windows Phone ajak tuluba küma ajungket nung ajungtsü, ta tetuyuba agütsüogo.
Iba app ya alima nung alir nisung billion ka dak temai amshir aser anogo nung message billion 42 yokteper, ta Facebook CEO Mark Zuckerberg-i tawa shiogo.