Blue Stars teloki 7 buba Silver Cup T20 takok marok agizükogo

7 buba Silver Cup T20 asayamong champions aser tanabuba jenjang angur asayartemi Brig. M S Nikam, Joint Director Dr. B. Lama, asayamong tayonger aser ketdangsertem den aroki agiba noksa yangi angur. (Kohima, March 27)

Kohima, March 27 (TYO): Blue Stars Cricket Club Dimapur teloki final asaya koka 7 buba Silver Cup Twenty20 (T20) Cricket Tournament takok marok yashi, Honibar nü agizükogo.
Blue Star teloki runs 20 agi Kohima Horbills ‘B’ telok final nung tsükdakja tan agi iba asayamong takok marok tanabenbuba agizüker lir.
Defending champions, Blue Star teloki mezüng batting asü aser Imliwati o Muzibur nati runs 38 aser 32 yangluba densema, par teloki overs 20 nung wicket 7 laoa ajak agi runs 149 yanglu.
Tesülen, Angshuman aser Probin nati runs 26 aser 25 yangluba densema, par Hornbills ‘B’ teloki kanga meranga asaya saka par teloki bilemba ama masayateti tamakok ajurutsüsa aküm.
Final asaya nung wicket 2 agiba den külemi, runs 18 tashi yanglusang, Blue Star asayar, Bhart Newar Man of the Match shima liasü.
Tan asayamong nung wicket 5 agiba den külemi, ajak agi runs 196 yangluba nüngtem nung Hornbills ‘B’ asayar, Anga nem Player of the Tournament aser Highest Run Scorer sempet agüja liasü.
Anga sülen anidaka, Blue Star asayar, Imliwabang-i Highest Wicket Taker; Sparks CC Dimpur asayar, Raktim Bonia-i Best Wicket Keeper; Royal Tourniquet asayar, Nirban Rai-i Emerging Player of the Tourney aser Kohima Hornbills ‘B’ teloki Fair Play Team sempet agizükba osang jangjaogo.
Tan asayamong sempet agütsüba sentong nung Group Commander, NNC Group Headquarter, Brigadier M S Nikam aser Joint Director, Nagaland Veterinary & Animal Husbandry Department, Dr. B. Lama na tongti tesemdanger aser tetushi tejaoker liasü.
Champions, Blue Star teloki takok marok o kuli kaket den senpet sen 70,000 aser tanabuba jenjang angur, Kohima Horbills ‘B’ teloki tanabuba jenjang takok marok o kulikaket den senpet sen 25,000 agizük.
Player of the Tourney takokba angur, Anga nem takok marok den senpet sen 3000 agütsü aser tanüngba individual shilem nung takok angur shia nem takok marok den senpet sen 1500 agüja liasü.
Tan asayamong semifinal nung tamakok angur telok ana nema senpet sen 5000 agütsü aser asayamong tenzükba sentong nung tongti tesemdanger, Nagaland School Education & SCERT, Yitachu-i nangzükba ama, tan asayamong nung shilem agir telok 24 prongla nem senpet sen 2000 agütsüba osanga jangjaogo.