BMW-i sen crore 1.5 alang X5M aser X6M sayaogo

Chennai, October 15 (Agencies): Germany nungi gari yanglur tettsüti BMW-i Brihostibar nü ‘M’ tarensen nung sports gari tasen ana, BMW X5M aser X6M sayaogo aser parnoki M Studio kübok iba jenjang aketba garitem ayoktsü asoshi tesem (outlets) trok lapoksemtsü sentong lir.

X5M nung 4.4-litre 8-speed petrol engine keta lir aser ex-showroom sentak nung sen crore 1.5 nungi tenzüka ayoktsü iba den külemi engine kasa keta aliba X6M bo sen crore 1.6 agi ex-showroom sentak nung ayoktsü kechiba süra iba ya Munich plant nungi bener arua ayoker.

BMW ayokba tesem Mumbai nung tang aliba ya dang liasü ajisüaka 2016 küm Delhi, Chennai, Hyderabad aser Bengaluru yimtitem dena tesem trok nung lapoksemtsü, ta BMW Group India nung Tir Philipp von Sahr-i metetdaktsüogo.

Madras Motor Sports Club nung iba gari tasen ana sayaba mapang Sahr-i, item garitem tanü nungi talitsü asoshi mekaa yutettsü, ta ashi.

Sahr-i, “Tan sayaba gari ana ya dena taküm küm asoshi India nung onoki gari tapu 14 sayar asütsü. Ano December ita matongtangsa gari ka sayatsü sentong lir,” ta shisem.

“BMW X5M aser BMW X6M garitem nung keta aliba accelerator ya kanga tashi tait aser ibaji ajanga gariji second 4.2 tsüngda nung kilometre 100 tashi kara aniteter,” ta Sahr-i ashi.

Tan sayaba gari tasentem ya sentsü tapu tenet nung angutsü.

Item gari ana nung ‘eight-speed M Steptronic transmission’ ketja lir koba ‘M-twinpower turbocharged V8 petrol engine’ tem den sentakloka lir. Gari ana yagi ghonda nung kilometre 250 kara oteter aser torque-a (tashi) 2200-5000 rpm nung 750 Nm tashi agütsütetter.

India nung BMW brand asem lir: BMA, Mini aser Rolls-Royce.

Chennai plant ajanga BMW series 1, Series 3, Series 3 Gran Turismo, Series 5 , Series 7, X1, X3 aser X5 garitem yanglua sayatsür.