Bob Dylan-i Nobel Prize sen agizüktsü asoshi ‘Nobel lecture’ agütsütsüla

March 29, 2017 (Agencies): Swedish Academy-i Nobel literature angutsü asoshi temsüa alisang, Bob Dylan dang Nobel prize den külemi angutsü asoshi aliba sen kronor million 8 (840,000 euros, $910,000) agizüktsü asoshi June 10 tashi nungbo Nobel prize den sendaktepa aliba inyakyim ama Nobel lecture ka agütsütsü asoshi tetuyuba agütsü.
Iba ‘lecture’ ya o jembiba tatsüka, mesüra ken ka atenba mesüra video ajanga shilem agiba ka sayaba asütsü akok, koba Nobel prize sentong agiba sülen ita 6 tsüngda nungbo inyaktsüla. Nobel prize sentong December ita 10 nü agia liasü, iba anoga ya ‘prize’ ngutetsang ‘Alfred Nobel’ asüba anogo lir.
“Bob Dylan tawa phone ajangaa jembia mali, saka pai sen angutsü asoshi Nobel lecture June 10 tashi nungbo agütsütsüla ta jangja meteta lir. Pai kechi telemtetba agidir agiaka, aji onok tebilemtsü masü” ta Swedish Academy nung permanent secretary, Sara Danius-i Hombarnü blog nung post sütsü.
Dylan Stockholm nung April 1 aser 2 nung kentenba sentong ayonga shilem agitsüba lir, aser iba sülen April 9 nü Lund yimti nung shilem agitsü. Pa Sweden semdangba mapang iba lecture agütsütsü ta imlar, saka kentener nungi kecha osang mali, ta academy ajanga metetdaktsü.
Danius-i ashiba agi, Dylan Stockholm nung shilem agitsü atema yaküm October nung Nobel prize magütsüdang nungi sentong yanglur liasü.
Dylan-i lecture magütsüyonga pasa 2016 ‘literature laureate’ asütsü.
“Swedish Academy atemabo 2016 literature nung Nobel laureate-ji tangar masü saka Bob Dylan dang asütsü,” ta Danius-i ashi.
Dylan ya ken zülur rongnungi mezüngbuba Nobel Literature Prize angusang asütsü. Yaküm December ita Stockholm nung iba sentong akadang kecha kuli magutsüi dang pa maden saka pelaba osang ka dang agütsü koba lokti tsüngdang ola adoka zünga metetdaktsü.
Taoba mapang nung Nobel prize agütsüba sentong nung medentetertem mepaidoktetba maparen balala ajanga medenteti liasü. Doris Lessing shibai 2007 küm iba award angu la kanga tain kümadokba ajanga medentet. Harold Pinter (2005) mozüki nung monga aliba ajanga medentet aser Elfriede Jelinek (2004) ‘social phobia’ aliba ajanga iba sentong nung medentet. Aji saka parnok ajaki Nobel lecture-bo agütsüogo.