Bob Dylan Nobel Prize agütsüba sentong nung oa medentettsü

November 16, 2016 : Sweden nung oa Nobel Prize agütsüba sentong nung Bob Dylan-i pa angutsü aliba Literature indang Nobel Prize magizüktettsü, ta Bodhbarnü Swedish Academy-i sangdong ka ajanga metetdaktsü.
Dylan-i, “Taruba ita Stockholm nung iba sempet agütsüba sentong nung ni arua medentettsü kechiba süra ni iba mapang jilia yanglur aliba mapa kar ajanga mazüngtsüsa akümer,” ta Nobel prize agütsüba telok dangi shidi ka yokogo.
Swedish Academy-i, “Dylan nai iba sempet anguba atema kanga pelar aser nai sempet ya arua agizüktet asübo kanga ajungtsü amai bilemer,” ta ashi.
Tesüiba mapangtem nunga iba sempet angurtemi sempet agizüki tonga marutetba lir, ajisüaka parnok nem sempetji odang agütsü. Anungji iba sempet agütsüba sülen ita trok tsüngda nung Dylan inyaktsü ajak agi Nobel Lecture ka agütsütsü nüngdak, ta sempet agütsüba teloki ashi.
Dylan ya ken zülur rongnung Swedish Academy-i agütsüba Nobel Prize mezüng angusang lir. Pai ken zülubatem ajanga America ken otsü nung sangro jenjang balakati ajungketba ajanga iba sempet pa nem agütsür.
Iba osang tejangja agiteptsü atema Dylan den inyakertem osangbenertem den jembitsüsa anasa maliasü.