Bodh Gaya amakba nung aibelener ajak taküm piyong tepoukdak ayutsü

Patna (Bihar), Aami/June 01 (Agencies): Tanü Bihar yimtiba, Patna nung aliba NIA court kati 2013 küm bomb aika amshia Bodh Gaya nung Mahabodhi temple amakba ken o nung aibelener parnok nisung pongu taküm tepiyong tepoukdak ayutsü atema obendang agütsüogo, ta lawyer kati metetdaktsü.
National Investigation Agency (NIA) court nungi Judge Manoj Kumar Sinha-i taoba ita iba ken o nung Umer Siddiqui, Azharuddin Siddiqui, Hauser Ali, Mujibullah Ansari aser Imtitaz Ansari nunger aija liasü.
Tanü Patna nung osangbenertem den jembidang NIA lawyer, Lalan Kumar Sinha-i, iba ken o nung temerenshi tulutibaji taküm piyong tepoukdak ayuba asütsü, ta metetdaktsü.
NIA chargesheet ajanga ashiba agi, 2013 küm July (Chiteni) 7 nü tekülem ki amakba nükjidongji linük aser bendanglen naprongla nungi tamanger raliwalirtem, talisa Buddhist amangbapurtem tepsettsü atema liasü.
Iba anogo nungji bomb 13 rema toktsüba nungi bomb 10 apok. Tesülen security sepaitemi tanüngba bomb asemji raksa-a indok.
Iba lendong nung monk (putir) ana densema nisung pongu yirua liasü.
Bodh Gaya temple ya Unesco World Heritage site ka lir, aser küm 2500 tejaklen iba tesem nung Buddha-i shisatsü ngua liasü.