Bodh Gaya ya tanela yimtiba ka kümtsütsü: PM Modi

Bodh Gaya (Bihar), September 05 (Agencies): Tanü Ato kilonser Narendra Modi-i, pei tamang yimsü benshiba nung timtem kecha mali, ajisüaka kari pei tangatetbaji tangar dak tashiyim ajanga benokba ajanga mangatettep aser rara adoker, ta ashi.

Bodh Gaya nung Maha Bodhi tekülem kidang Hindu-Buddhist senden nung jembidang Modi-i, tang Delhi nung tamangba yimsü ana nungi shisashirtem senden nung adenertemi telemtetba tajung kar agiogo, ta ashi.

“Anogo ananü senden nung onük ana nung telemtetba tajung ka dangi aruogo. Rara dak sentakba onük nung- rara timbaka tamangba yimsü nung tangar tangatetba magizüktetba ajanga adoker ta shilem agirtemi bangjemtepogo, iba dak alia pei tamangba yimsü benshiba nung timtem kecha mali, ajisüaka kari pei tangatetbaji tangar dak tashiyim ajanga benokba ajanga mangatettep aser rara adoker ta agizüktetogo,” ta ashi.

Anogo ana tejaklen Delhi nung amenba sendenji Vivekananda International Foundation & Tokyo Foundation ajanga ayongzüka liasü.

Modi-sa, Bodh Gaya ya tamangba yimsü yimtiba ka kümtsütsü asoshi sorkari inyaktsü, ta ashi.

“Alima ajunga nungi Buddhist nungeri Bodh Gaya ya tamang ainlen jajaba tesem ka ta agizükbaji ni meteta lir. Bodh Gaya ya tanela yimtiba ka akümtsü asoshi aser India aser Buddhist tesentaktep atema India nung alirtemi Bodh Gaya nung terenlok agütsütsü,” ta ashi.