Bodo Accord ajanga yimjung bener arutsü: Modi

Kokrajhar, February 7 (Agencies): Independent India nung Kokrajhar rally ya tulutiba lir, ta Hokolbarnü Prime Minister Narendra Modi-i ashi.
Assam kübok Kokrajhar district nung Bodo Peace Accord indang benjung amongdang Modi aden.
“Ni inyaka arudang rally aika nguogo, saka ni iba ama telok tulu kodanga mengudang. Iba ya India nüjiso anguba sülen rally tulutiba asütsü” ta Modi-i ashi.
“Tanü anogo asenoki linük atema taküm bendanga agütsürtem bilemteter. Tanü asenoki Upendra Nath aser Roop Nath Bramha bilemteter aser akhüm tetushi agütsür” ta paisa ashi.
Iba sentong nung Prime Minister Modi-i Assam kübok Bodo nunger tesemtem atema sen crore 1500 development package agütsütsü osang sangoktsü.
Bodo Accord ya teti atema yimjung angutsü aser putu tasen tenzüktsü atema lenmang ka lir. Bodo lanurtemi temai adoka linük yariba atema pelar, ta Modi-i ashi.
Taoba sorkari Northeast indang khurettem agizük saka koktettsü atema lenmang mebushi, ta paisa Congress sorkar aitsü.
Citizenship (Amendment) Act (CAA) atema olen ka jembidang “nisung lokti ozüng alema arua malitsü ta ni Assamese nunger dang nangzüker. Northeast nung chichiba India sensotem pei lima nung refugee mekümdaktsütsü” ta Prime Minister-isa metetdaktsü.
Assam Accord indang report anguba sülen Centre-i Clause 6 mapa küma inyaktsü atema merangtsü, ta paisa shisem.
“BJP sorkar akümba sülen Northeast state aika nungi Armed Forces Special Powers Act (AFSPA) agienogo. Onoki sorkar makümdang Northeast state teimba ka nung AFSPA ozüng liasü. Saka ozü sorkar akümba sülen Tripura, Mizoram, Meghalaya aser Arunachal Pradesh nungi agienogo” ta Modi-i metetdaktsü.