Bodo nunger BTAD tema nung alirtem atema autonomous council ka akhanger

Guwahati, March 26 (Agencies): Honibarnü All Assam Tribal Sangha sanenluden senden nung Bodoland Territorial Areas District(BTAD) tema nung aliba Bodo-Kachari kin kümzüka ayutsü atema ‘autonomous council’ ka kümtettsü asoshi khanga liasü.
Constitution Sixth Schedule kübok 2003 küm Centre, Assam sorkar aser tangbo anentsür aliba Bodo Liberation Tigers Force tsüngda accord ka kulizünga ayuba sülen BTAD ya kümteta liasü. BTAD kübok Kokrajhar, Chirang, Baska aser Udalguri district tem densema lir aser kin balala nungi nütsüng lakh 30 shi lir.
Sangha ajanga ashiba agi, ‘autonomous council’ ka kümtetba ajanga BTAD tema nung aliba Bodo-Kachari nunger nütsüngtem nem India nunger temzüng kübok kümzük ayutsü.
“Onok ali aser yimten yimsüsübaren nung kümzüka ayutsü nüngdaka lir. Onok sobaliba aser maitsü lendong nung lir, kechiyong Sixth Schedule kübok India nunger temzüng ajanga kümzüka ayutsüba nung onok züngsema mali. Autonomous council ka kümtetba ajanga dang onok kümzüka yutet,” ta Sangha tongti zülur Aditya Khaklari-i ashi.
Paisa ashiba agi, Bodo-Kachari nunger lakh 9 shi Brahmaputra ayongküm, north aser south len lidar. Khaklari-i ashiba agi, perokshia aliba nütsüngtem ‘satellite council’ tem ajanga achaayangtsü aser ‘autonomous council’-i BTAD telongtet alema or aliba nüburtem ketdangsübaren achaayangtsü.
Iba senden nung maneni kin 6-i ST jenjang meshiba anema Sangha-i ajang ajanga nokdaktsü lemtet. Item kintemji; Koch Rajbongshi, Tai Ahom, Moran, Motok, Sootea aser adivasi nungertem alitsü.