Bodo nunger tetsürtem dang jeans masemtsü ashi

Guwahati, October 18 (Agencies): Bodo nunger tetsürtem dang jeans masemtsüba asüngdanga poster campaign ka aoba ajanga Assam kübok Bodoland Territorial Council (BTC) tesemtem nung nisungtem ajak aoksadaktsüogo.
Iba poster ya All Bodo Students’ Union (ABSU)-i agütsüba lir aser parnoki Bodo nunger tetsürtem dang jeans melena parnok indang sobaliba süoshi ‘dokhona’ asemtsüba atema ajungshir.
Ajisüaka Absu office tongtiba nungi ashiba agi, parnoki iba campaign atema temelaba magütsü. Absu tir Pramod Boro-i osang benertem dang ashiba agi, parnoki bushisüngdang tenzükogo.
“Bodo nunger tetsürtem jeans mesemdaktsüi nokdangba indang tebilemdangba ya bo ni magizükteter. Bushisüngdang ajanga ngutetba agi, Absu Subankata unit nung züngsem kari poster tem tesem kar nung madaktsü. Saka iba ya central committee ajanga tetuyuba agütsüba ka masü,” ta Boro-i ashi.
Iba tatalokba ya ghonda 24 tsüngda nung social media balala nung prokshi aser iba ajanga locals tem animesüngzükteti kümdaktsü.
“Bodo nunger tetsürtemi parnok sobaliba sobutsü kanga metsünga reta amshir. Yimya agi parnoki lokti senden balala aser sobaliba sentong balala nung dokhona semer adener. Yamaji kaketshisatsü bushidak tesem aika nung Bodo tsürtemi parnok sobaliba süoshi sümer class tem nung adener,” ta Bodo nunger lokti leniri ashi.