Bodo nungeri October 24 nü ‘rail roko’ ayonger

Guwahati, October 22 (Agencies) : Bodo nunger telok aikati Hombarnü ghonda 12 ‘rail roko’ alitsü ayongzükogo. Bodoland state balaka tentettsü takhangba agüja iba lungkak aitba sentong ayonger, ta Bodo nunger lennir kati ashi.
Centre aser state sorkartem nem takhangba agüja onoki Assam kübok Basugaon (Kokrajhar district) aser Udalguri (Udalguri district) nung train lenmang nokdangtsü, ta All Bodo Students Union President, Promod Boro-i ashi.
October 24, 2016 anepdang 5:00 ako nungi ghonda 12 lungkak aitba sentong tenzüktsü aser iba mapang Basugaon o Udalguri nung Bodo nunger nisung lakh ka tema adenshitsü, ta Boro-isa ashi.
Lungkak aitertemji Peoples’ Joint Action Committee for Bodoland Movement (PJACBM) nungi lir aser parnok ya civil society telok balala den National Democratic Front of Bodoland’s (NDFB) pro-talk teloktem longjemer tentetba lir.
Iba sentong ajanga Assam aser north-east kübok tesem balala nung train tem timtem ajurutsü kechiyong train aika Kokrajhar aser Udalguri district tem adena senzür.
“May 2014 nung BJP sorkar aruba sülen onoki Union Home Minister Rajnath Singh den tenetben tashi aser Minister of State for Home Kiren Rijiju den terben tashi ajurutepogo. Sorkari Bodo nunger takhangba thinena ayutsü atema dang inyaker ta onoki ajiteter”ta Boro-isa metetdaktsü.
Bharatiya Janata Party lennir aser Assam Chief Minister Sarbananda Sonowal-i taoba mapang election nung iba asoshi nangzükogo. Ajisüaka mapa kecha meinyak, ta ABSU lennirisa ashi.
ABSU-i August 30, 2016 nü Assam kübok aliba National Highways ajak ghonda 5 tashi nokdanger lungkak aita liasü.