Bodo nungeri rongsenkettsüng lenmang mokdangtsü amokmerener

Guwahati, March 10 (Agencies): Assam nung kin tuluba, Bodo nungeri state tasen ka tentettsü takhangba agüja tanü nungi tenzüka mapang telatet ka makai Guwahati nung lumia longkak ait tenzükogo.
All Bodo Students Union (ABSU), National Democratic Front of Bodoland-Progressive) aser People Joint Action Committee for Bodoland Movement (PJACBM) leniba nung lumai longkak aitba sentong tenzük.
Bodo nungeri, lumia takhangba agüjaaka iba onük atema telangzba magütsüra taruba ita nungi parnoki gari lenmang aser train lenmang mokdangtsü, ta amokmerenogo.
Bodo tentettemisa, Manipur nung rongsenkettsüng lenmang mokdangba mesüka parnokia rongsenkettsüng lenmangtem mokdangtsü, ta metetdaktsü.
Iba dak sentakba nung Kokrajhar aser Bodo Territorial Area Districts (BTAD) tesemtem nung nisung 2,000 dak temai longkak aitba nung shilem agiogo.
ABSU Tir, Pramod Bodo-i, “Centre sorkari Bodoland metentet tashi timtem alitsü, iba ya 2014 küm Lok Sabha election mapang Bodo nunger teyari meshidang Bharatiya Janata Party (BJP)-i nangzüka liasü,” ta metetdaktsü.
Assam Police-i ashiba agi, longkak aitba azüoktsü atema parnoki mera ajak agiogo.
Director General of Assam Police, Mukesh Sahay-i, “Tensa azüoka lir. Longkak aitdang parnoki tashiyim mamshitsü atema onoki mera ajak agiogo,” ta ashi.
Tanep ABSU nungi teshimtet telok kati Assam Chief Minister, Sarbananda Sonowal ajurua Bodo onük jembia liasü.