Bodo telungpur anema operation tulutiba tenzükogo

Chirang (Assam), September 19 (Agencies): Assam nung Bodo telungpur telok NDFB anema Indian Army aser Assam Police na senteper “operation tulutiba” tenzükogo, iba operation ya talisa Bhutan den International arrtsülen aotsü, ta Honibar nü police tongti ketdangser kati ashi.
Chirang district nung 4 Corps commander Lt Gen Sarath Chand ajurua security tensa nung shisalemsatepba sülen osangbenertem den jembidang Assam Director General of Police (DGP) Khagen Sarma-i “Yashi (Hokolbar) onoki NDFB telungpur anema operation tulutiba tenzükogo. Tanü senden nung parnok anema agitsü meratem indang onoki lemsatepogo,” ta ashi.
Ken o mejembiba telok National Democratic Front of Bodoland (NDFB) nung anünga aliba züngsemtem rangben samatsütsü nükjidong nung iba operation ya Assam nung Bodoland Territorial Area Districts (BTAD) nung tenzükogo. Chirang ya BTAD nung densema lir.
DGP-isa, taoba mapang security sepaitemi NDFB anema operation nung takok ngua liaka, tang tashi nungbo iba telok mesamatsüteti lir, ta ashi.
Pai ashiba agi, yaküm December ita nung Adivasi nunger jenti tepsetba nung densema alisang NDFB commander B Bidai tang jenshia senzüdar.
“Jenshia senzür ka angutsüji tasak, talisa arem nung ajanga parnoki maongka angur. Ajisüaka pai temai adoka security sepaitem amaktsü merangra, onoki pa putettsü,” ta Sarma-i ashi.
NDFB telungpur kar tang tashi Myanmar nung lir aser parnokji India telungi maitdaktsütsü atema security sepaitemi meranga miter, ta police ketdangseri ashi.
Lt Gen Chand-i ashiba agi, taküm January ita nung Bhutan arrtsü, Kokrajhar, Chirang, Baksa aser Sonitpur aremtem nung security sepai 4,000 shi yoka lir, aser item tesemtem nung operation tesashiba odagi.
Sarma-isa, Centre sorkari iba tensa ya junga repranga atadar, aser iba telok ya rangben mesamatsü tashi operation aotsü, ta ashi.