Bodoland dak sendakba nung ABSU-i sorkar aitsü

Guwahati, Rongchii 27 (Agencies): All Bodo Students Union (ABSU), NDFB (Progressive) aser People’s Joint Action Committee for Boroland Movement (PJACBM) puri Yangtepnü BJP-i aniba state aser Centre sorkar aitsüogo aser Rongchii (April) 26 ya ‘Betrayal Day’ ama District tenet nung mungogo. Bodoland tebilemtsü dak sendakba nung sorkari telangzüba tajung ka magütsüba atema parnoki iba sentong ya ayongzüka aka.
Iba sentong ya ABSU-i ayongzüka Kokrajhar, Chirang, Baksa, Udalguri, Sonitpur, Lakhimpur aser Karbi Anglong district tem nung kaogo, kong district shia nung nisung noklang aikati ghonda asem tashi mener longkak aita liasü.
Absu tir Promod Boro-i ashiba agi, kaketshir lokti tentet ajanga Bodoland tebilemtsü bentettsüba atema sorkari inyakyim ka achaayanga tenzüktsüba asoshi Rongchii (April) 26 nü ya tatembangbuba anogo asütsü lateta toktsü, saka Centre aser state nung BJP-i aniba sorkari onok tebilemtsü angadangtsü asoshi mapang mali. BJP party-i parnoki sorkar kümtetra Bodoland tebilemtsü bentettsütsü ta nangzük, saka Centre nung BJP-i aniba sorkari küm pezü tsüngda kecha inyaka mali, ta paisa ashi.
ABSU tir-i ashiba agi, state sorkari ULFA puri takhangba tem atema dang telangzüba agütsür, saka NDFB bo sentoka toktsür. “Sorkari Ulfa pur tebilemtsü bentettsü asoshi kanga temulung agüja inyaker. Parnoki ashiba agi, Paresh Baruah-i aniba telok den longjemogo saka parnoki tang tashi raradar. Ajisüaka NDFB dak sendakba nung sorkari parnok telok ya melungjem anungji parnok tebilemtsü ya mebentettsütsü, ta ashir” ta paisa ashi.