Boko Haram anema raratsü asoshi mitkar 2,450 yoktsü: Biya

Yaounde, August 15 (Agencies): Nigeria aser kidangsüa aliba linüktem nung lendong kanga sashia atalokdaktsüba kiralongrar telok, Boko Haram anema raraba maparen nung yariteptsü asoshi mitkar züngsem 2,450 tashi yoktsü tenangzükba olen ka Cameroon Tir, Paul Biya-i tanü Honibar nü metetdaktsüogo.
“Nigeria den külemi lungjemer, Chad, Niger, Benin aser Cameroon nunger densemba linük 5-i tentetba teloktep mitkar teloki Boko Haram ta ajaba Islamic telok meshi meshia samatsütsü nükjidong nung ozü mitkar züngsem 2,450 tashi yoktsü nangzüker,” ta pai metetdaktsü.
Biya-i par mitkar züngsem meyirijang ana dak tema yoka teloktep mitkar telok den yaritepdaktsütsü asoshi tan nangzükba ya taoba mapang nangzükba den mitkar züngsem anasü agi timba küma yoktsü nangzüker lir.
Iraq aser Syria na nung lendong kanga sashia atalokdaktsüba Islamic State (IS) kiralongrar telok tetsüti den sentakteptsü lemtetba osang ka taküm 2015 küm tetenzüklen sangoktsüba Boko Haram telok meshi meshia samatsütsü asoshi linük 5-i mitkar züngsem 8,700 shi densemba teloktep mitkar telok ka tentettsü asoshi taküm February ita renema lir.
Iba teloktep mitkar telok den yariteptsü asoshi par mitkar züngsem 750 yoktsü asoshi Cameroon-i mezüngbo nangzük saka par mitkar züngsem meyirijang ana dak tema yoktsü asoshi Biya-i tan nangzükshir lir.
Chad yimtiba, N’Djamena nung tesepti tentettsü asoshi renemba teloktep mitkar teloki kobi meli Boko Haram telok anema rara tenzüktsü renemba osang ka Chad Tir, Idriss Deby-ia tan hopta tetenzüklen metetdaktsüogo.