Boko Haram-i Cameroon nung 20 tepset

 

Yaounde, September 04 (Agencies): Peisasa pokseta asütsü mulungteter anati pei temang nung alenokba bomb Comeroon anüdoklentip tsütsü Kerawa jila nung tanü Hokolbar nü pokdakja lendong kanga sashia atalokdaktsüba osang jangjaogo.

“Tanü atalokba bomb lendong nung ishiba agi nisung 20 poksetba aser nisung jenti yiruba osang tang tashi nung jangjaogo,” ta Cameroon sorkar otongdar aser Communication Minister, Issa Tchiroma Bakary-i metetdaktsü.

Nigeria’er Borno State den kidangsüa aliba Kerawa jila nung tentetba mozüki mesademba yong tanü yirur timbaka kidangsüa aliba jila balala nung tentetba mozüki anir oa idakji anepaluba osang jangjaogo ta paisa ashi.

Tanü mezüngbuba lendongji peisasa pokseta asütsü mulungtetba tetsür chanu kati Kerawa nung tentetba shishilembadak atalokdaktsü aser iba lendong nung yirurtem anir oa anepalutsü tenzükdak, mitkar mozüki ka nung peisasa pokseta asütsü mulungteter tebur kati tanabuba lendongji atalokdaktsü ta pai metetdaktsü.

Tanü lendong atalokdaktsüba atema telok shingaia tang tashi nung tenüng agia metetdakja mali saka tanü lendongji Nigeria nung tentetba kiralongrar telok, Boko Haram mapa asütsü akok ta Bakary-i temulung malemba olen ka metetdaktsüogo.

Taküm July ita nunga Boko Haram teloki peisasa pokseta asütsü mulungtetba tetsür chanutem yoka Nigeria’er Borno State arrtsülensa tentetba tesemtem nung Cameroon nunger 60 shi tepsetba osang bushiteta lir.

Par telok samatsü maparen nung Cameroon-i Nigeria mikartem den yaritepba yong Boko Haram teloki kidangsüa aliba Cameroon nung tan amala lendong balala mapang shia atalokdaktsüba osanga bushiteta lir.