Boko Haram teloki Nigeria nung nisung 14 poksetdaktsü; 39 shi yirutsü

Maiduguri, October 02 (Agencies): Peisasa pokseta asütsü mulungba Boko Haram züngsem 4 tashi pei temang nung alenokba bomb pokdakja Nigeria yimtiba, Maiduguri nung tanü Hokolbar nü bomb lendong tesashi atalokdaktsüba osang jangjaogo.

Tanü lendong atalokdaktsür 4-ji densema tanü lendong nung ishiba agi nisung 14 poksetba aser nisung 39 shi yiruba osang tang tashi nung jangjaogo ta Nigeria sorkar ketdangsertemi metetdaktsü.

Tan lendong atalokdaktsür 4 rong nung nisung 2-bo tetsür aliba osang bushitetogo ta parnoki shisem.

“Boko Haram kiralongrar telok züngsem 4 tashi tanü Maiduguri yimti kübok Ajilari railway crossing nung bomb lendong tesashi ka ataloktsüba osang jangjaogo,” ta mitkar otongdar kati osang jangjashitsü.

Nigeria nung Islamist yimüsütsüren benoktsü merangba Boko Haram teloki tan amala lendong balala Maiduguri nung mapang shia atalokdaktsüba osang bushiteta lir.

Taoba September ita 20 nüa par teloki bomb lendong ishika atalokdaktsüba ajanga ishiba agi nisung 100 shi asüba osang jangjaogo.

“Boko Haram telok meshimeshia samatsütsü,” ta shia, Nigeria Tir, Muhammadu Buhari-i taküm August ita nungtu par mitkar lenirtem nem Boko Haram telok meshimeshia samatsütsü asoshi ita 3 mapang agüja liasü.

Ano külen, Boko Haram züngsem 80 tashii yashi Brehostibar nü temai adoka Bama jila nung sorkar mitkartem nem bendanga agütsüba osang ka mitkar lenirtemi metetdaktsüogo.

2009 küm nungi tenzüka tanü tashi nung Boko Haram teloki Nigeria nung nisung 10,000 dak tema tepseba osang bushiteta lir.