Boko Haram teloki pua ayur nisung 338 kümzüka anitet: Mitkar

Nigeria mitkartemi Boko Haram kiralongrar tesep amakba sülen par teloki tashiyim agi pua ayuba nisung 338 tashi kümzüka aniteta parnok Mubi tonga anir aoba noksa nung angur. (Mubi, October 28)

 Lagos, October 28 (Agencies): Nigeria mitkartemi Nigeria linük Islamist yimli kümdaktsütsü merangba kiralongrar telok, Boko Haram-i tashiyim agi pua ayur nisung 338 tashi kümzüka anitetba osang ka mitkar lenirtemi tanü Bodbar nü metetdaktsüogo.

“Boko Haram teloki Sambisa aremlen tentetba tesep nung tashiyim agi pua yua alir nisung 338 tashi ozü mitkar züngsemtemi kümzüka anitetogo. Tan kümzüka aniteter rong nung tila tanur 192 aser tetsür 138 densemaba osang tang tashi nung jangjaogo,” ta parnoki osang jangjashitsü.

Nigeria mitkartemi Sambisa aremlen tentetba Bulajilin aser Manawashe yimtsüng na mita aoba sülen tashiyim agi pua ayuba nisungtemji kümzüka anitetba den külemi, Boko Haram züngsem 30 shi tepseta parnoki rizünga ayuba prangpong injang jenti bena aruba osanga jangjaogo

Küm 6 tejaklen nungi tenzüka Nigeria sorkar kanga sashia anemba Boko Haram telok meshimeshia samatsütsü nükjidong nung Nigeria mitkartemi ita ishika tejaklen nungi tenzüka par telok mita amakba maparen kanga sashia tenzüka lir.

Ano külen, Nigeria’er air force mitkartemia par tayimtsü amshia Boko Haram teloki anishiba gari aser totzü rizükdak ishika poksatsüba osang ka Nigeria Air Force Chief, Sadique Abubakar-ia tanü metetdaktsüogo.

Taküm May ita nungi tenzüka Nigeria Tir menden benoksang, Tir Muhammadu Buhari-ia taküm December ita tashi nung Boko Haram telok meshi meshia samatsütsü ozüng ka par mitkartem nem agüja lir.