Bollywood-i actor Saeed Jaffrey asüko lemsateper

November 16, 2015: Shekhar Kapur, Rishi Kapoor aser Madhur Bhandarkar nunger dena Bollywood nung shilem agirtemi actor tejen Saeed Jaffrey asüko lemsatepogo. Pa arishi küm 86 nung asü.

Jaffrey-i akümlidang Bollywood film aika nung aser Britain film tem nung shilem agia liasü.

Pai shilem agiba film rongnung “Gandhi”, “Shatranj Ke Khiladi”, “Henna”, “Ram Teri Ganga Maili”, “Dil”, “The Man Who Would Be King” aser “A Passage to India” tem ya kanga nüngtugu film tem lir.

Kapur-i mezüng direct asüba film “Masoom” nunga Jaffrey-i shilem agia liasü. Kapur-i, “Tatem salem Saeed. Masoom film nung nü den külemi ni film nung ajemok. Nü dak temeim aketba aser tejangraba aliba mamateter,” ta twitter nung lemsatep.

Jaffrey tembar aser “Henna” film nung külemi shilem agisang, Rishi Kapoor-ia twitter ajanga pa nem tetushi agutsüogo.

“RIP, kü medemer Syd Jeffries (Saeed Jaffery). Na onok toktsür ao’er,” ta Rishi-i twitter nung lemsatep.

Film yanglur Ashoke Pandit-i, “Nisung kangasa tajung aser nüngtugu actor alima nungi pilaba angashia temulung kanga raksar. Jaffrey asüba ajanga FilmIndustry kanga akoksatsü. RIP,” ta twitter ajangasa lemsatep.

“Million Dollar Arm” film nung tongti shilem agisang, Pitobash-i, “RIP Saeed Jaffrey Sir! Na kanga menungratsü…” ta lemsatep.

“Actor #SaeedJaffrey asüba ajanga temulung mepelar. Ni pa den khen mapang ka Assistant director ka ama külemi inyaka liasü. Par kibong den asüko lemsateper,” ta Bhandarkar-ia twitter nung lemsatep.

“Pa actor kangsa tajung aser pa ya ni kanga sapua liasü. Pai Shatranj ke Khiladi film nung kanga junga shilem agiteta liasü,” ta kentener Shaan-i twitter ajanga lemsatep.

Jaffrey-i international film tem nung Sean Connery, Michael Caine, Roshan Seth, James Ivory, Richard Attenborough aser Daniel Day-Lew nunger dena külemi shilem agia liasü.

Jiloshi aiba ajanga India nunger rongnung mezüng ‘Order of the British Empire (OBE)’ agüsangji pa lir.

Pa asüba osang angashia Ato kilonser Modi-i, “Saeed Jaffrey ya sempet aika aketba actor ka liasü aser pa dak aketba sempettemji teti bilemtettsü. Pa asüba asüko lemsateper,” ta ashi.

Jaffrey-i mezüng, actress, Madhur Jaffrey den kibong aküm aser la den tanur asem sosema lir. Tena jala Sakina-a actress tajung rongnung ka lir. Kinungtsü tena 1965 küm bala aser iba sülen pa director, Jennifer Sorrell den 1980 küm tanaben kibong aküm aser tena külemi lia pa iba lima nungi pila.