Bollywood-i APJ Abdul Kalam mang ayimer

Mumbai, July 28 (Agencies) : 2002 nungi 2007 tashi India nung Tir inyaker aser ‘People’s President’ ta ajar Abdul Kalam Hombar aonung Shillong nung asü aser pa asüba osang angashia Bollywood nung züngsem aikati mangyimba osang lemsateper.
Pezüben tashi National Award angur composer Rahman-i ashiba agi linük ajungmesor tekolok ka samaogo.
“Dr Kalam, na Tir akümdang India nunger asoshi teimla tasen ka bener arutsü. Tanü lanur ajungmesor lennir tajung ka onok dang nungi pilaogo. Teyangluri na kotaki anir oangma” ta Rahman-i pa indang Facebook page nung metetdaksü.
Ano, Bollywood nung kentener mongin Lata Mangeshkar-ia Facebook ajanga mangyimba lemsatepogo.
“Asen taoba tir, President, Bharat Ratna Dr APJ Abdul Kalam asüba osang kü dang ashi. Iba osang angashia ni kanga jashir. Ni pa kanga junga meteta liasü. Pa scientist tajung ka, meimchir tajung ka aser sangro mejemer tajung ka liasü. Ni pa tushir. Pa yimjung nung anisüngzükangma” ta Lata Mangeshkar-i ashi.
Ano külen, actor Shah Rukh-i kiralongrartemi Gurdaspur amakba aitsüba den külemi Kalam asüba asoshi sasa bilemba metetdajktsü. “Gurdaspur amakba osang aser tang Dr. Kalam asüba osang angashidang kanga jashir. Allah-i nisung ajak nem yimjung bener arujangma” ta pai ashi.
“People’s president – Dr APJ Abdul Kalam asüba osang angashia kanga jashir. Linük atema dang masü saka alima ajunga atema takoksa ulura” ta Ajay-ia Twitter nung metetdaktsü.
Rajya Sabha MP aser Bollywood screenwriter- lyricist Javed Akhtar-ia Kalam asüba asoshi mulung zürepba osang metetdaktsü.
Actor Varun Dhawan-ia “Mangdang aketba lennir ka alima nungi pilaogo. Tekolok techira ka. Pa indang ‘Wings Of Fire’ kaketji linük nung lanur shiai azüngtsüla.”
“Dr Kalam den aiben ajurutepa sensaksemogo. Pa menürem ajanga nisung million aika pua. Dr Kalam ket nungi Padma Shri agizükba atema ni kanga pelar. Pa ket nungi anguba ajanga iba sempet khenyongi balaka kümdaktsü. Pa ni atema teti ajungmesor ka asütsü” ta Anupam Kher-isa metetdaktsü.
Ano Bollywood nungisa Amitabh Bachchan, Salman Khan, Priyanka Chopra, Anushka Sharma, Sonakshi Sinha, Mahesh Bhatt, Karan Johar, John Abraham, Sajid Khan, Meiyang Chang, Alia Bhatt, Arjun Kapoor, Mohit Chauhan, Divya Dutta, Shreya Ghoshal, Neha Dhupia, Madhur Bhandarkar, Kunal Kemmu, Farhan Akhtar, Ayushmann Khurrana, Adnan Sami, Lara Dutta Bhupathi, Sushmita Sen, Manoj Bajpayeeaser Sidharth Malhotra nungertemi mangyimba osang metetdaktsüogo.