Bollywood-i Mahatma Gandhi bilemteter

Mumbai, October 02 (Agencies): Deobarnü linük tebuti, Mahatma Gandhi asoba anogomung ‘Gandhi Jayanti’ nung Lata Mangeshkar, Amitabh Bachchan aser Anupam Kher nunger densema Bollywood nung nüngtugu nisungtemi Mohandas Karamchand Gandhi bilemtetogo.
Bollywood nung nüngtugu nisungtemi Gandhi bilemteta twitter ajanga osang balala lemsatep. Parnokisa India nung tanabuba Ato kilonser, Lal Bahadur Shastri küm 112 ajungba anogomong nung pa bilemtet.
Nüngtugu kentener, Lata Mangeshkar-i, “Tanü ya linük tebuti, Mahatma Gandhi asoba anoogmong lir. Pa bilemteta ni akhüm agütsür,” ta ashi.
Amitabh Bachchan-i, “Tepela anogo October 02, Gandhi Jayanti,” ta ashi.
Anupam Kher-i, “Linük nung tetangshi lenir na tepela tasoba anogo osang lemsateper. Mahatma Gandhi aser Lal Bahadur Shastri. Nünaji onok atema teti tashi asütsü,” ta ashi.
Mahesh Bhatt-i, “Tang alima nung ammang tia ka ajangshir amai. Saka nisung kaji teimla nung alir aser teimla kaa asür. Tepela Gandhi Jayanti,” ta ashi.
Hema Malini-i, “Tanü anogo ya Gandhi asoba anogomong lir. Linük atema pai senmang tulu toktsüogo aser pa tangatebatem benshitsüji asenok teinyaktsü mapa lir,” ta ashu.
Riteish Deshmukh-i, “India nung takotet lenirtem tanü parnok asoba anogomong nung bilemteter. Mahatma Gandhi, Lal Bahadur Shashtri, ajungmesoba, tepela,” ta ashi.
Raghu Ram-i, “Gandhi Jayanti nung linük nbur aak dangi salem abener. Alimai pa leniba tang tenüngdakba kümogo,” ta ashi.
Bhumi Pednekar-i, “Senso ajak den tepela Gandhi Jayanti lemsateper. Pai asenok dang tasütait aser taremzük sayu. Asenoki pa tsüngsü nung jajatsü merangdi,” ta ashi.