Bollywood nung asayamenür, Razzak Khan alima nungi pilaogo

Mumbai, June 01 (Agencies): Bodhbarnü Bollywood film nung asayamenür aser television actor, Razak Khan temelungjang tashitak ajanga alima nungi pilaogo.

Actor Khan ya Bandra nung aliba Holy Family Hospital-i ilonga anir ao saka pa tasü bener aru ta yangji aliba doctor temi sangdong.

Tanep anepongi 12:30 ako meta pa temlungjang tashitak atuba sülen Holy Family hospital-i anir oa liasü.

Razak’er jabaso Asad Khan Croatia linük nungi Mumbai tonga aruba sülen Brihostibar nikongdang 4:00 ako nung Narialwadi Kabaristan, Byculla nung asüpila sentong agitsü.

Razak akumli mapang pai Salman Khan-i tongti shilem agiba film Hello Brother, Hera Pheri, Shahrukh Khan-i tongti shilem agiba film Baadshah aser Aamir Khan-i tongti shilem agiba film, Raja Hindustani nunger nung shilem agia liasü.

Khan-i mezüng TV show, Nukkad (1986-87) nung shilem agi aser Bollywood nung mezüng Roop Ki Rani Choron Ka Raja (1993) nung shilem agia ajemok. Bollywood nung küm 23 inyaka arudang pai film 90 dak tema nung shilem agiogo.

Yaküm pai Comedy Nights With Kapil nunga shilem agia liasü aser pai tesasabuba 2016 küm Kyaa Cool Hain Hum 3 nung shilem agia liasü.

Pai Bollywood nung 1993 küm nungi 2016 küm tashi inyaka aruogo, aser iba mapang pai asayamenür ka ama shilem balala agia aru.