Bolt-i Australia nung mezüngsüa tokteptsü

Melbourne, Australia nung Nitro Athletics sayaba sentong nung Usain Bolt den külemi Australian Olympians-  Anneliese Rubie aser Morgan Mitchell nunger shilem agiba noksa nung angur.

Melbourne, November 04 (Agencies): Jamaica nunger toktepa asemer mongin, Usain Bolt-i mezüngsüa Australia nung tokteper küma, taruba 2017 küm February ita agitsü ayongba Nitro Athletics tetoktepba nung shilem agitsü renemba osang ka tanü, Hokolbar nü metetdaktsüogo.
Australia kübok Melbourne nung agitsü ayongba tetokepba nung taoba mapang Olympic champion 9 ben tashi akümtsü jenjang ajangzüksang, Bolt-i ‘Bolt All-Stars’ telok captain ama toktepa shilem agitsü renema lir.
“Melbourne nung agitsü ayongba tetoktepbaji taoba mapang ayonga agiba den kanga agi tajungba track & field tetoktepba alitsü aser iba yongji, ni tetokteper ka ama dang masü saka captain ama toktepa shilem agitsü renema lir,” ta arishi küm 30 tain Bolt-i Melbourne nung agiba tetoktepba sayatsüba sentong nung metetdaktsü.
Alima ajunga nung tekaratiba nisung ta züngshisang, Bolt-i taküm August ita Brazil kübok Rio de Janeiro yimti nung agiba 2016 Olympics nung Olympic medal 3 tashi agizüka, ‘Triple triple’ ta ajaba takokba ajangzüka liasü.