Bolt o Ayana nati IAAF Awards agizükogo

Jamaica nunger Usain Bolt (Achijilen) aser Ethiopia tsür, Almaz Ayana nati French Riviera kübok Monaco nung 2016 IAAF tebur aser tetsür World Athelete of the Year sempet amer agiba noksa ka yangi angur. (Monaco, December 03)

Monaco, December 03 (Agencies): Jamaica nunger Usain Bolt aser Ethiopia’er tetsür distance asemer. Almaz Ayana nati IAAF Atheletes of the Year sempet yashi, Hokolbar nü agizükogo.
Taküm 2016 küm August ita asayaba Rio Olympic Games nung alima ajunga nung tekaratiba ta züngshisang, Bolt-i tebur 100m, 200m aser 4x100m relay gold agizüka, ‘triple triple’ ta ajaba takokba ajangzüker mezüng küma otsü tasen yanglua liasü.
Bolt-i mapang minute 9.81 aser minute 19.78 na nung 100m aser 200m alizüng tekaratiba mapang nung tonga takok anguba den par Jamaica teloki minute 37.27 nung 4x100m relay takokba ajangzüktsüsa kanga junga shilem agiba sülen ayongba agiba asemteptsü tetoktepba ajunga nung takok ngua shilem agiba nüngtem nem pa nem tan sempetji agütsü.
Bolt-i tan agi IAAF Athlete of the Year sempet 6 ben buba agizüker lir.
Pai taoba mapang ajangzükba world takokba 11 den timba kümdaktsütsü nükjidong nung Britain kübok London nung taruba 2017 küm agitsü ayongba 100m tetoktepba nung maneni shilem agitsü asoshi arishi küm 30 tain Bolt-i alizüng yua lir.
Ayana-ia Rio Olympics nung tetsür 10,000m tekaratiba mapang nung atongba otsü tasen yanglua kangasa junga shilem agi.
Lai minute 29 ser second 17.45 nung alizüng atongba sülen China tsür Wang Junxia-i minute 29:31.78 nung alizüng tonga 1993 küm yangluba otsü ajangteta liasü.
Lai maneni tetsür 5000m takokba ajangzüka, iba tetoktepba shilem nung Diamond Race takoker akümba osang jangjaogo.
Lai tan nungtugu sempet agizükba sülen la IAAF sempet agizüker Ethiopia tsür tasembuba akümer lir.