Bomb agi amakba ken o nung NDA-i Hindu nunger anemabo sashia meinyaker: Owaisi

New Delhi, June 22 (Agencies): Bodhbarnü AIMIM Tir, Asaduddin Owaisi-i, bomb amshia amakba ken otem nung Narendra Modi’er sorkari tai tonglokja alir Hindu nunger anemabo sashia meinyaker, ta aitsü.
Modi’er sorkar küm ana ajungba dak sentakba nung osangbenertem den jembidang Owaisi-i, “Bomb agi amakba ken otem- Malegaon, Hyderabad Mecca Masjid aser Ajmer tatalokbatem nung tai tonglokja alirtem anema parnoki (BJP-i aniba NDA sorkar) sashia meinyaker, kechiyong parnokji tamangba lokti majority (Hindu) nungi lir,” ta ashi.
Hyderebad nungi Lok Sabha MP, Owaisi-isa, “Parnoki (BJP) kümshia lanurtem nem mapa (BJP) crore 1.20 agütsütsü nangzük. Ariena mapa lakh 5 dang adokdaktsütet. Osettsüset nung jenjang aludaktsütsü ta parnoki nangzük. Jenjang anüng tonga atur, iba nungji menjang aser tanga chiyungtsütem densema lir,” ta ashi.
BJP sorkar tashii arudang totzü tazü barrel ka nung US sen 85-90 liasü, aser tangbo barrel ka nung US sen 35 tashi ajema aluogo, ajisüaka petrol aser diesel totzü jenjang majemer, ta paisa ashi.
“Rongsenkettsüng tsütsü mapatong kecha mali. Osettsüset jenjang atuba mazüoktet. BJP-i parnoki nangzübatem nung tamakok nguogo,” ta paisa aitsü.