Bomb lendong atalokdaktsür 2 buba puogo: Prayut

Bangkok, September 01 (Agencies): Taoba July ita tekülemdak bomb lendong atalokdaktsüba ken o nung ajemdaker temulung melemi bilemba bendanger ka Cambodia arrtsülen apuba osang ka Thailand Ato Kilonser, Prayut Chan-O-Cha-i tanü Mongolbar nü metetdaktsüogo.

Bangkok yimti tiyongtsülen tentetba tekülemdak taoba August ita 17 nü atalokdaktsüba bomb lendong nung China nunger külemküjar timba densema ajak agi nisung 20 shi pokseta liasü aser tan pua alisangji iba ken o nung ajemdaker temulung melemi bilemba bendanger tanabuba lir.

“Cambodia arrtsülen, Thailand kübok Sa Kaeo checkpoint nung temulung melemi bilemba bendanger ka pua lir,” ta mitkar junta lenisang, Prayut-i tanü osang jangjashitsü.

Tan apusangji Bangkok kübok Chidlom shopping district nung tentetba Erawan shrine nung lendong atalokdaktsür rong nung densema ali asü ta asüngdangdang, “Tan pau alisangji bendanger ka lir aser pa den tasüngdangba sentong tenzüka lir. Iba maparenji tembangba sülen ang osang tejangjabo meteta akümtsü,” ta Prayut-i langzü.

Ano külen, kechi timtem ajanga Bangkok nung bomb lendongji atalokdaktsü iba osang tang tashi mejangjatet lir.

Iba ken o nung ajemdaker, tenüng memetetdaktsüba tebur 3 densema police-i temulung melemi bilemba nisung ishika aputsü asoshi ozüng adokja lir.

Tanü tashi nung police-i tetsür ka tenüng dang yimjak nung metetdakja lir aser laji arishi küm 26 tain Thai Muslim tsür, Wanna Suansan aliba osang jangjaogo.

Suansan aliba kidang bomb yanglutsü osettsüset anguba osang ka police-i metetdakja lir.

Bangkok nung bomb lendong atalokdaktsüba ken o nung ajemdaker temulung melemi bilemba bendanger mezüngbubaji taoba Honibar nü apu aser iba nisungbaji tang mitkar ket nung aliba osang jangjogo.

Ajisüaka, police-i iba nisungba tenüng yimjak nung tanü tashi memetetdaktsüi lir.