Bombay High Court-i Bill Gates & SII dang telangzüba meshir

Mumbai, September 2, 2022 (Agencies): Bombay High Court-i Hokolbarnü Serum Institute of India (SII) aser Microsoft founder Bill Gates dangi telangzüba meshia sangdong yokogo.

Dilip Lunawat-i par jala Covishield agiba sülen asü ta Bombay High Court nung ken o benoka lir aser pai iba takoksa atema Rs 1000 crores temenok meshir.

2020 küm Serum Institute of India-i India aser third world countries asoshi Covishield vaccines 100 million doses yanglutsü aser agütsütsü atema Bill and Melinda Gates Foundation den tesentaktep yanglu.

Iba ken o nung Union of India, Ministry of Health and Family Welfare, Drug Controller General of India, Dr VG Somani, Drug Controller General aser Dr Randeep Guleria, Director of AIIMS nunger dena lir.

Dilip Lunawat ya Aurangabad nung alir aser pai okadak ashiba agi “par jalaji Dhamangaon nung aliba SMBT dental college nung doctor aser senior lecturer ka liasü.”

SMBT dental college nung health workers ajak vaccine agitsüsa akümba agi par jalaia vaccine ji agi ta Lunawat-isa ashi.

Iba mapang par jala dang vaccine dak lendong kecha mali aser la temang nung timtem kecha magütsütsü ta ashi. Dr Somani aser Guleria nati interview aika nung vaccines dak lendong kecha mali ta shiogo ta Lunawat-isa okadak ashi.

Paisa lar jala January 28, 2021 nü agiba vaccine certificate agütsüsema lir.

“La ya March 1, 2021 nü Covishield vaccine ajanga temang nung timtem adoka asü” ta paisa shia lir.

Iba ya Centre sorkar indang October 2, 2021 Adverse Events Following Immunisation (AEFI) report nungsa shisema lir, ta paisa metetdaktsü.

Dilip Lunawat-i par jala nem temeten agütsünür aser ketdangsürtemi ozüng alema inyaksangshiba nungi nisungtem taküm kümzüka yunür ta ashir.