Bombay lawyers-i Loya asüba ken o meyipa reprangshitsü mepishir

New Delhi, Monupii/May 21 (Agencies): Special judge, B H Loya asüba ken o independent telok ka nem bushisüngdangdaktsütsü mepishiba magizükba ajanga Supreme Court (SC)-i aibelen tulu ka inyakogo, ta shia Bombay Lawyers Association-i SC dang iba obendang meyipa reprangshitsü mepishi.
Rongchii/April 19, 2018 nü SC-i, Loya asüba ken o nung melung malemtsüsa kecha mali, ta shia iba ken o bushisüngdangtsü mepishibatem magizük.
Commissioner of state intelligence-i bushisüngdangba nung ajemdaker SC-i, pa asüba nung melung malemtsüsa lir ta ashitsüsa kuli mali, ta metetdakja liasü.
SC-i iba obendang agütsüba sülen ita ka shi lir tang Bombay Lawyers Association-i review petition file süogo; Association-i, SC-i state intelligence tongtii bushisüngdangba nung metalokba ajanga aibelena inyakogo, ta ashi.
“Police tongti ketdangser ka süaka iba ken o nung pai kuli peria mebushitet. Iba court-i kuli peria meshisadangi iba ken o sendokba ajanga parnok tashi aser akhümket nung tasüngdangba akatsüsa lir,” ta review petition nungji shia lir.
“Judge ka asüba ken oji High Court mesüra Supreme Court tetuyuba nung Commission of Enquiry Act mesüra enquiry kübok independent telok kati bushisüngdangtsü akhanger,” ta petition nungsa shia lir.