Bombay Velvet film tamakok agi tebilemtsü akar: Anurag

November 23, 2015: Film yanglur, Anurag Kashyap-i, cinema otsü nung “Bombay Velvet” film ya film rongnung takoksa tulutiba aluba film ka lir aser iba tamakok agi tebilemtsü bener aruba ya ni kodanga mamatettsü, ta ashi.
Iba film ya sen aika endoka yanglu aser film nung Ranbir Kapoor, Anushka Sharma aser Karan Johar nungeria shilem agia lir.
Arishi küm 43 tain, Kashyap-i, studio tulu kati film yanglutsü asoshi sen agüja alitsü nangzükba atema pelar ajisüaka pai film yangludang endokba sen kodanga memenoktettsü ama bilema shisa bulur, ta ashi.
“Tangari kü nükjidong tongtsütsü asoshi nangzük, ni mezüng yongi yamaji meinyaktsü liasü. Ni küm 10 bilema aliba mapa ka tangar khuret kümdangtsübaji tim masü. Parnoki nü tebilemba alir aser nü nükjidong alir. Iba film ya sen crore 90 alang project ka lir. Ni iba sen laluba ya mapang talangka mamatettsü,” ta Kashyap-i NFDC Film Bazaar mapang interview agidang ashi.
Arishi küm 43 tain, “Gangs of Wasseypur” film yanglusang, Kashyap-i, sen ya ni asoshi tetsübutsü ka lir aser tan “Bombay Velvet” nung laluba ajanga tarutsü asoshi tangazükba tajung ka nguogo aser joko sen aika aotsüsa film meyanglutsü, ta ashi.