Bomber yokba ajanga US-Iran tensendaktep tamajungba akümer: Pakistan

Islamabad, Monupii/May 17 (Agencies): Persian Gulf nung tang tensa mejungi aliba ya kanga minprongtsüka ta Pakistan-i Brehostibarnü ashiba den telok ajak dang azüzüktepa inyaksangshitsü mepeshi, kechiyong jenjang tai ka agiba ajanga mangatettep tulu adokdaktsütsü ana nung lir.
“US-i aircraft carrier aser bombers yoktsü telemtetba agiba ajanga Middle East nung mepetmesü adoka aliba tamajungba kümdaktsüogo. Telok ajaki azüzüktepa inyaktsü onoki imlar kechiyong jenjang tai ka agiba ajanga tensa tamajungba kümdaktsütsü,” ta Foreign Office otongdar Mohammad Faisal-i ashi.
Pai ashiba agi, US aser Iran na tsüngda mangatettep adoka aliba ya sensaksem ajanga bentettsüla kechiyong rara asoshibo mebilemtsüla.
Tasüngddangba ka langzüba mapang Faisal-i ashiba agi, Ato Kilonser Imran Khan, Shanghai Cooperation Organisation (SCO) Heads of State senden nung shilem agitsü koba Kyrgyzstan yimtiba Bishkek nung June 13 aser 14 nü akatsü.
Paisa, Foreign Minister Shah Mehmood Qureshi-i May 21 aser 22 nü Bishkek Council of Foreign Ministers semdangtsü kong pa SCO senden nung shilem agitsü.
Faisal-isa, US nungi Pakistan nunger anir arutsüba ken o ya linük ana tsüngda joko mapang tatsüka jembishinüa arudar, ta ashi.
Paisa ashiba agi, Pakistan nunger shirnok US nung alitsü atema kecha timla mali parnok dang Pakistan sorkari Pakistan nunger asü masüar kanga junga jangjashiba sülen anir arutsü.