Bon Jovi-i küm 32 sülen Mercury Record toktsüogo

August 24, 2015: Rock kentener Bon Jovi-i küm 32 sülen Mercury Records toktsüogo.

Kentener telok ‘Bon Jovi’ nung tongti kentener arishi küm 53 Jon Bon Jovi-i, “Iba ya mapang ka tembanger lir” ta metetdaktsüba den külemi iba label den lenmang pilabaji kanga tako ta ashi.

Paisa parnok sapurtem dang, otsü tejangja metetnüra par telok tesüsabuba kensep nüngja ken, “Burning Bridges” ken angadaktsüner, ta mepishiogo, ta Billboard magazine osang ajanga ashi.

“Iba ya mapang ka tembanger lir. (iba kensep ajanga) Mercury Records den tenangzüktep agiba ka ataloktsüogo. Küm 32 sülen onok lenmang pilar,” ta Jovi-i ashi.

“Nai Burning Bridges ken angara, iba nungji tejangja shia lir. Iba ken ajanga tatalokba tejangja ashitsü. Kenjangji angang, kechiyong ibaji ajanga tatalokba tejangja ashitsü,” ta paisa ashi.

Iba kensep nung ken tatembangbuba Burning Bridges kenjang (lyrics) nung, “Küm 30 junga aliba sülen parnoki nü nem leper tudaktsür. Tangbo nai ken atentsü mesüra kongki atemtsü angazüktsü akok. Nü nü nem publish asüba tesadang ka agütsütsü. Na ajanga ni iba ken zülu,” ta zülua lir.

Bon Jovi-isa ashiba agi, par telok nung guitar atemsang Richie Sambora-i telok toktsüba sülen parnok timtemogo, ajisüaka parnoki kensep tasen ka renemdar aser 2016 küm tetenzüklen nungi alima sema kentena senzütsü.