Borbothar area semdangba

~ I.B.Meren
President,
Mokokchung District Pensioners’ Association

IEF nung ketdangsüa inyaker Moachang Jamiri ayongteper onok terok (6) Lolensangba, Pastor dena March 9, 2016 nung Rev.Rekum Memorial English School, Borbothar semdangi ao. Iba field nung IEF tenüng nung Mangmetong Arogoi yaria yokba Rev. & Mrs. N.I.Meren Jamir, Head Master cum Missionary, par kibong den kanga pelatepa ajurutep. Late Rev.Rekum den iba field yagi 2003 küm March ita nung aodang iba lima ya ano ayong apu mali, lenmang majung, electric light tesangwa mali aser nüburtemji limapur merükmeju mali, school mali ajaklen ayaterem ama tang liasü. Iba lima ya ayong tulu agi meketbanger asetkong ka ama lir. Iba asetkong nung yim 18 lir. Late Rev.Rekum yim shia hopta kadak jia monga Yisu yimsü tajung sayua tanela temeshi agizüka tzü nung tzüsentsü aser jatenli revival tajung katsüli ta inyak. Sayatenya jentisa jenti ataloka Tsüngremi mapa jenti iba lima nung inyak.
Küm 13 buba nung iba lima tanaben semdangtsüsa lenmang lapoktsü nung Tsüngrem tenüng asanger. Küm 13 tsüngda nung alima kanga tang develop sür angu. Kanga tang tsüngsarusa lima light mali kanga timtemer, anungji parnok light arudakjang ta sarasadem. Kanga sayatenya ka nung government-i electric lightji bener arutsü. Iba den yimdong black topping menoka yanglutsü, apu-a tulu anabo permanent apu yanglur ano tanüngba apu teyangludak lir.
Parnok area president-ia Yisu yimsü amangba ajanga alima kanga sangwaa kümogo. Aser Missionary aser tebutsü tenadi tanela anir aruba tsütsü kija masü saka school compound den ano iba area development nung aser lenmang aisü nung shisa agüja yarir. Area nüburtemi par leniba nung kanga temulung chia lir ta shia laisü.
School kiji takdang aika keta ki tulu Mangmetong Arogoi yanglutsür, Class VIII tashi lir. School tanur 155 aser hostel nung tebur 15 tetsür 5, parnok 20 lir. Saka tetsür atema hostel junga mali nung Missionary kidang takdang ka nung parnok liasü. School compound tulu ajungaji italong agi atsü tang teyangludak lir.
Iba field nung Arogo 18 lir aser Arogo asembo tenlaki tajung yangluogo ano kar under construction nung lir. Yim ana nungbo joko yimer ajak amangogo. School mapa den compound development mapa jenti den item arogotem semdanga kanga mazüngi jajar ta Rev. & Mrs. N.I.Meren den jembia liasü. Arogo nunger aika tanela nung jangrar saka aiben rongsen ketdangsüba nung mulung melemtep otsüsa shia liasü.
13th March Deobarji Rev.Rekum Memorial English School Sunday liasü. Onok taortem ajak Arogo kaka lemer Honibar aser Deobar sentep nung School otsü jembia sentep agia liasü. Ano nikongtsütsü School Management Board, Head Master aser tesayur ajak den meeting liasü. Pastor Lolen den School tesayur Mangmetong nungi taortemi School inyakyim indang lemsatepa liasü. School tanurtem dena meeting agia tajungshi O den sarasadem tajung agia liasü.
Field tasen mapa jenti lir saka tang nungdakji tetsür hostel ka yanglutsüba aser School ki (building) kilem nung rong anütsü (roof painting) yakta inyaktsüla ta jembia liasü.
Talisa Rev. & Mrs. N.I.Meren kanga mazüngi mapa jenti inyaka angudang onoka temoatsü tulu ngua anogo 3 tashi iba field nung par kibong den munger aruogo.