Bosch-i India nung 2015 atema sen crore 650 invest asütsü

Bengaluru (Karnataka), October 06, 2015: Mongolbar nü Bengaluru nung Ato kilonser Narendra Modi aser Germany Chancellor, Dr. Angela Merkel nati Robert Bosch Engineering & Innovation Centre semdangba noksa nung angur.

 Bengaluru, October 6 (Agencies): Germany nung gari yanglur company-i India nung taküm asoshi sen srore 650 enoka parnok mapa inyaktsü ta metetdaktsüogo.

“India ya onok business asoshi nüngdakba tesem ka lir. Anungji onok inyakyim tali tashi aittsü asoshi 2015 küm atema sen crore 650 enoktsü,” ta Asia-Pacific nung Bosch board of management züngsem Peter Tyroller-i ashi.

“Terenlok agütsüba tsütsü onok meyong India nunger engineer tem ajanga linük nung kanga takok bentsür aru,” ta Tyroller-i ashi. Pai, India nunger engineer tem ajanga India nung Bosch jenjang tali tajungba küma ajungkettsüba dang masü saka alima ajak nung parnoki terenlok tsütsü nungitba metetdaktsüogo.

German Chancellor Angela Merkel-i anogo asem atema India semdangi aruba mapang Ato Kilonser Narendra Modi tenati Mongulbarnü German indang Bosch yangluba tesem ghonda ana shi agia semdanga liasü.

‘Make in India’, atema renemshiba mapang ka nung Bosch yangluba tesem semdangdang Modi aser Angela na nem ‘Make in India’ logo molusüngzü noksa ka ka agütsüdang, Ministry of External Affairs nung otongdar Vikas Swarup-i, “Tarütsü asoshi technician renemshiba mapang. India nunger nükla adangji nung ataloktsü,” ta twitter ajanga lemsatepa liasü.