Botsa nung awareness program ka agi

Dimapur, Rongjui/September 24 (TYO): Khen dang amshiba plastic osetem amshitsü nokdangba dak sendakba nung September 23 nü EAC office, Botsa nung awareness sentong ka ayongzüka agiogo.
EAC Botsa, Saratho Katiry-i yimtsüng balala nungi Village Sanitation Board tem dang pei yimtsüng nung plastic amshiba nokdangtsü atema kanga junga asadangtsü mepeshi. Paisa, biodegradable products tem pei yimtsüng nung yanglua amshitsü ajungshiba den plastic amshiba nokdangtsü asoshi ajak longjemer inyaktsü nüngdakba lemsatep.
Sentong nungsa Dr. Ropfukolhou Dole-i plastic ajanga health aser tzümopung dak dak kongshiba lemsatepba den sentepa aliba nüburtem dang jana bendentsü asoshi ongken tua amshitsü ajungshi ajiasünungdang biodegradable jana tem tajungtiba nung amshitettsü.
Maneni, Zhahelie Rio, VCC aser Botsa Business Community Union tir Joel Kath, nungeria o tatsütsü jembi kong tenati lokti-i shilem agitsü koda tongtibang iba indang jembiba den plastic amshiba nokdangba nung takok tashi teyari agütsütsü nangzük.
Plastic nokdangba dak sendakba nung powerpoint presentation ka Dziesengunuo Kire, EAC Chiephobozou-i agütsü. Iba sentong ya Baptist Church Seiyhama Pastor Khriezelhou-i temoatsü meshia sarsademer tenzüka liasü, ta DPRO Kohima sangdong ka ajanga metetdaktsü.