Boufarik Airport anasa sepai tayimtsü tsüko; 257 süogo

Algiers, Rongchii 11: Algeria yimtiba, Algiers anasa Boufarik nung Rasemnü mitkar indang tayimtsü ka tsükokba nung firefighters aser civil security ketdangsertemi mapa inyaba mapang tangokba noksa nung angur. Iba tayimtsü tsükokba lendong nung nisung 257 taküm sama aser kar taküm kümzük, ta Algerian emergency services ajanga ashi.

Algiers, Rongchii 11 (Agencies) : Tanü Rasemnü Algeria yimtiba Algiers nungi tatsüka pilar sepai tayimtsü anendak ka anasa Algeria sepai tayimtsü ka tsükoka nisung 257 süogo, ta osangbenertem aser ketdangsertemi metetdaktsü.
Anüngleni yimketa tur mapang tatsüka tsüngda Boufarif airport anasa tayimtsüji tsüoka passenger 247 den tayimtsü nung inyaker 10 süogo; parnokji teimba armed forces nung inyaker aser parnok kinüngertem liasü, ta official-temisa metetdaktsüogo.
Reuters osang ajanga ashiba agi, tayimtsü nungji sepaitem den ano Western Sahara kübok Polisario independence movement nung züngsemtema kar densema liasü.
Algiers yimti nungi anüolentip tsütsü kilometer 25 pilar tsüokba tayimtsüji Ilyushin II-76 liasü.
Tayimtsü tepenlakji olive süngdongtem temalen juteta adoka aliba nguogo aser tayimtsü teraksa nungi mokozü alongba aser milak jangruba nguogo.
Iba lendong atalokli ambulance noklang aika den mi enseptsüba gari aika tesemji tonga ao.
2014 küm February ita nunga Tamanrasset aser Constantine yimti na tsüngda sepai indang tayimtsüka tsüoka nisung 77 taküm sama.
Ano kasa küm July ita nung Air Algerie indang passenger tayimtsü ka Burkina Faso nungi Algiers yimtii aruba mapang northern Mali nung tsüoka France nunger 54 densema tayimtsü nung mena alir ajak agi 116 süogo, ta kasa osang ajanga metetdaktsü.
Tanü iba lendong atalokba sülen asüama ajurur kibongtem den mangyim jashi lemsatepba osang ka ministry ajanga metetdaktsüogo.