Bournemouth-i Arnaut Danjuma alizükogo

Luroi/August 1, 2019 (Agencies): Bournemouth-i Dutch international winger Arnaut Danjuma, Belgium indang Club Bruges nungi alizükogo, ta club sangdong ka ajanga Brehostibarnü metetdkatsü.
Eddie Howe-i aniba teloki Lloyd Kelly, Jack Stacey aser Philip Billing nunger sülen season tasenba atema tang Danjuma alizükogo.
Bournemouth, sangdong ka ajanga ashiba agi arishi küm 22 tain asayar den mapang talangka asoshi tenangzüktepba yangluogo saka pa alizükba taa mesangdong, ajisüaka Belgian media sangdong ajanga ashiba agi, pa den küm pongu asoshi tenangzüktepba ka yangluogo aser euro million 15 shi indokogo.
Danjuma ya PSV Eindhoven nung youth system nungi atu aser iba sülen NEC Nijmegen nung 2016 küm aden.
Taoba küm pa Bruges-i ao aser pa iba club nungi season ka asayaba mapang parnok Belgian league nung tanabuba jenjang nung tembang. Pai Champions League nunga goal idaktsüogo aser Netherlands team nunga anioka asayadar.
“AFC Bournemouth-i aruba ya ni asoshi jenjang tajung ka lir,” ta Danjuma-i club indang TV channel dang ashi.
“Nai asayanüba ama asayatsü atema Premier League ya tesem tajung ka lir aser talisa iba amala club ka nung nai asayanüba ama asayateter. Iba team-i asayaba yimya ya kü asayaba yimya den puteptsü ta ni bilemer, kechiyong ni attack süner aser ni club nungi asayatsü matateter,” ta paisa ashi.
Bournemouth pur Premier league asaya mezüngbuba Sheffield United den asayatsü ataa lir.

You must be logged in to post a comment Login