Bouterse-i Suriname Tir tanabenren inyaktsü jenjang nguogo

Paramaribo, July 15 (Agencies): Suriname linük Tir, Desi Bouterse-i Tir menden tanabenren abentsü jenjang yashi Mongolbar nü nguogo.

Taoba mapang nung Netherlands linük nung ozüng alema mozü mora shibelenba ken o nung aibelenba kuli bushiteta aitsüsang, Bouterse-i aniba National Democratic Party (NDP) yimtenren teloki taküm 2015 küm May ita agiba parliamentary election nung takok ngua National Assembly tentettsü maongka angu.

Yamaji arur külen, par linük indang Tir menden asoshi Bouterse den candidate ka ama tokteper shinga mekai akümba yong Bourterse par Suriname linük Tir menden tanaben abentsü asoshi parliament-i yashi shimshiba osang jangjaogo.

Linük temzüngi melaba ama parliament züngsem 34 abensaba sülen parliament-i Bourterse Tir shimshiba sentongji agia liasü.

Netherlands nung tentetba okadak kati taoba mapang, 1999 nung aibelener medeni agiba ken o angadangba sentong ka agiba sülen Bouterse-i ozüng alema mozü mora shibelenba ken o nung aibelenba kuli bushita pa aitsüba osang bushiteta lir.

South America northeast tsütsü tentetba Suriname-i 1975 küm Netherlands nungi nüjiso ngua linük tasen ka tentet.

Hon aser Bauxite jenti angudak, Suriname linüki totzüa ali telung nungi tutettsü tenzüka lir.