Bowling jungra, India team-i maongka tajung agitettsü: Harbhajan Singh

New Delhi, Mongputeni/October 22, 2021 (Agencies): India cricket team nung tasa balala amshia asayar batter tajung aika lir. Ajisüaka, taoba India off-spinner Harbhajan Singh-i, tang asaya aliba T20 World Cup asayamung nung bowling shilem junga asayara, Virat Kohli-i aniba team-i tanga team madak takok ngua/tejakdang asayatsü asoshi maongka tulu angutsü ama bilemer, ta lemsatepa liasü.

“UAE indang pitch tem nung, mezüng batting asütsü shima run 170 (Over 20 nung) tashi yanglura, tanga team den toktepa asayatsü asoshi tajung asütsü; aser bowling line-up tsütsü asalentong tajung yanglua asayara, parnoki (India) tanga team azüoktettsü/koktettsü. Asaya mashi ka nung, India team-i run 150 dak tema yanglutetra, parnoki bowling ajanga tetokteper team azüoka asayatettsü akok,” ta Harbhajan Singh-i ashi.

“Iba T20 World Cup asayamung nung, India team bowling ajanga tanga team ajangteta asayatsü asoshi maongka angutsü,” ta Singh-i ashi.

“Team bowling line-up nung bowler talisa Jasprit Bumrah, Varun Chakravarthy, Ravinder Jadeja aser Bhuvneshwar Kumar nungeri asaya nung temelenshi tulu adokdaktsü akok,” ta pai shisem.

Ajisüaka, ground balala talisa Sharjah ama kong asaya atema  pitch kanga tongtibang, iba nung run yanglutsü süshia mesüra wicket agitsü atema balala asütsü, saka Dubai aser Abu Dhabi nung pitch tem tanga tesem ama masü,” ta pai ashi.

Alima ajunga asüngba Covid-19 wara dak sendakba nung, Australia-i bendager shinga marudaktsütsü aser Australia nunger bendangleni modaktsütsü atema arrtsü shibangba sülen, 2020 cricket calendar nungi iba asayamung (T20 World Cup) thinena liasü. Iba sülen, taküm küm tetenzüklen India-i iba asayamung ayongzüktsü sentong renem, saka linük nung tanaben Covid-19 wara adokba ajanga iba asayamung tanaben thinena liasü.

Deobarnü (October 24, 2021), T20 World Cup nung India-i parnok campaign tenzüka kidanger – Pakistan den asayatsü terenemba lir.